चेतन व्यास, वर्धा

Samruddhi Mahamarg Accident Update News : बुलडाण्यातील सिंदखेडराजाजवळ समृद्धी महामार्गावर मध्यरात्री बस अपघातात २६ प्रवासी मृत्युमुखी पडले. कुणाचे आई-वडील, कुणाचे बहीण भाऊ, कुणाचे नातेवाईक, कुणाचा मुलगा या काळानं हिरावला. यात वर्धामधील सेलू तालुक्यातल्या झडशी गावातील करण बुधबावरे हा देखील होता.

करण घरातला एकुलता एक कमावता मुलगा. वय अवघं २८ वर्षे. मुंबईत राहणाऱ्या बहिणीला माहेरी आणायला गेलेल्या करणवर काळानं झडप घातली. त्याच्या आईवर तर दुःखाचा डोंगर कोसळलाय. तर त्याच्या आईच्या जीवाला काय वाटलं असेल, या विचारानंच अख्खं गाव हळहळलं. (Accident News)

समृद्धी महामार्गावर (Samruddhi Mahamarg Accident) खासगी बसला अपघात झाला. या बसमधून प्रवास करणाऱ्या २६ जणांसाठी ही काळरात्र ठरली. या अपघातातील मृतांमध्ये वर्धामधील सेलू तालुक्याच्या झडशी येथील रहिवासी करण पुरुषोत्तम बुधबावरे (वय २८) याचाही समावेश आहे.

करण हा आखाडीसाठी मुंबई येथे राहणाऱ्या बहिणीला माहेरी आणायला निघाला होता. पुण्याला तो मित्राच्या घरी राहणार होता. त्यानंतर मुंबईला जाऊन बहिणीला घरी घेऊन जाणार होता. पण त्याआधीच बहिणीच्या एकुलत्या एक भावाला काळानं तिच्यापासून हिरावलं.

५ वर्षांपूर्वीच वडिलांचं निधन

करण याचे वडील पुरुषोत्तम यांचे पाच वर्षांपूर्वीच अल्पशा आजाराने निधन झाले होते. करणची आई शेतमजुरी करते. फेब्रुवारी महिन्यात त्याच्या लहान बहिणीचं लग्न झालं होतं. घरात तो आणि आई असे दोघेच होते. संपूर्ण घराचा भार करणच्या खांद्यावर होता. वडिलांच्या निधनानंतर त्यांच्या जागी करणची टपाल खात्यात पोस्टमनपदावर मागील वर्षी नियुक्ती झाली होती. त्याच्या अपघाती मृत्यूनं आईवर दुःखाचा डोंगर कोसळला आहे. तर अख्ख्या गावावर शोककळा पसरली आहे.