राज्यातील विधानसभा निवडणुकीसाठी आज मतदान होतंय. २८८ मतदारसंघांसाठी हे मतदान होत असून सकाळी ७ वाजल्यापासून मतदानाला सुरूवात झालीये. यावेळी सेलिब्रिटी क्रिकेटर सचिन तेंडुलकर याने आपला मतदानाचा हक्क बजावला आहे. मुंबईच्या वांद्रे इथल्या मतदान केंद्रावर जाऊन त्याने मत दिलं आहे.

काय म्हणला सचिन तेंडुलकर?

सचिन तेंडुलकर याने त्याची पत्नी अंजली आणि मुलगी सारा यांच्यासह मतदानाचा हक्क बजावला आहे. मतदान केल्यानंतर सचिन तेंडुलकर म्हणाला की, आजच्या दिवशी सगळ्यांनी या आणि मतदान करा. निवडणूक आयोगाचा मी ब्रँड ॲम्बेसेडर असल्याने मी गेल्या वर्षभरापासून मतदान करण्यासाठी आवाहन करतोय. आज देखील मी तेच करेन. यठिकाणी चांगल्या सोयी सुविधा चांगल्या आहेत त्यामुळे सगळ्यांनी येऊन आवर्जून मतदान करावं.

माझी आशा आहे की, सर्व जण पुढे येतील आणि त्यांचा मतदानाचा हक्क बजावतील, असं सचिनने म्हटलं आहे.

जनतेला आला होता थेट सचिनचा फोन

मतदानाबाबत जनजागृती करण्यासाठी मास्टर-ब्लास्टर सचिन तेंडुलकरचा फोन महाराष्ट्रातील जनतेला येत होता. टीम इंडियाचा माजी क्रिकेटर सचिन तेंडुलकर हा भारतीय निवडणूक आयोगाचा ब्रँड अँबेसिडर आहे. त्यामुळे मतदारांपर्यंत पोहचून त्यांना मतदानासाठी प्रोत्साहन देण्यासाठी आणि त्यांना मतदानासाठी आवाहन करण्यासाठी निवडणूक आयोगाकडून सचिन तेंडुलकरचा रेकॉर्ड केलेला कॉल जनतेला आला होता.

ऑगस्ट २०२३ मध्ये सचिनची भारतीय निवडणूक आयोगाने मतदान जागृकता आणि शिक्षण यासाठी नॅशनल आयकॉन म्हणून नियुक्ती केली होती. त्यानंतर तो मतदानाबाबत जनजागृती करतो.