राज्यात निवडणुकीचा प्रचार शिगेला पोहचलेला असताना आता कुणाची सत्ता येणार याचे सर्व्हे सुरू झाले आहेत. काही संस्थांनी केलेल्या सर्व्हेत महायुतीची सत्ता येणार असल्याचा अंदाज व्यक्त करण्यात आलाय. त्यामुळेच उपमुख्यमंत्री अजित पवारांनीही महायुतीलाच यश मिळणार असून तब्बल पावणे दोनशे जागा मिळतील असा दावा केलाय.

याला दुसरे उपमुख्यमंत्री देवेंद्र फडणवीस यांनीही दुजोरा देत महायुतीचीच सत्ता येणार असल्याचा विश्वास व्यक्त केलाय. महायुतीच्या नेत्यांचा दावा मविआनं फेटाळलाय. एवढंच नव्हे तर महायुती केवळ भ्रम निर्माण करण्यासाठी सर्व्हे करत असल्याचा आरोप ठाकरे गटाचे खासदार संजय राऊतांनी केलाय.

राज्यात पुन्हा एकदा सर्व्हेवरुन महायुती आणि मविआमध्ये जुंपलीये. भाजप सर्व्हेमधून भ्रम पसरवते असा आरोप करत संजय राऊतांनी सर्व्हेवरुन जोरदार टिका केलीये. यावेळी बोलतांना संजय राऊतांनी महायुतीला 160 ते 165 जागा मिळतील असा दावा केलाय. तर सर्व्हेवरुन संजय राऊतांच्या दाव्यावर अजित पवारांनी महायुतीचं टार्गेटच जाहीर केलंय.

लोकसभा निवडणूकीत सगळे सर्व्हे निकामी ठरले होते. सत्ताधारी पक्षाला ४०० पार जागा मिळतील असं सर्व्हे सांगत असत असतांना जनतेनं सगळे सर्व्हेचे आकडे मतदानातून फिरवल्याचं दिसलं आणि म्हणूनच लोकसभेतला निकाल पाहून देवेंद्र फडणवीसांनी संयमी प्रतिक्रीया दिलीये.

निकालाआधीच ज्या सर्व्हेच्या आकड्यावरुन गदारोळ सुरु झालाय. ते सर्व्हेचे आकडे काय सांगतायेत पाहूया.

महायुतीला 145 ते 165 जागांचा अंदाज

मविआला 106 ते 126 जागा मिळण्याचा अंदाज.

आजवर मतदानाआधी आलेल्या सर्व्हेनं अनेकदा जनतेला संभ्रमात टाकणारे आकडे समोर आणले. परंतू खरा मतदार राजा कोणाला किती जागा देतो हे येत्या २३ तारखेलाच स्पष्ट होणार आहे.