अगदी ग्रामंपचायत ते लोकसभेच्या निवडणुकीत कुठे लपूनछपून तर कुठे उघड-उघड पैशांचा वापर होतो. हे वास्तव आहे. राज्यात राजकीय संघर्ष शिगेला पोचलेला असतानाच पुण्यात पाच कोटींची रोकड सापडल्यानं राजकीय वातावरण तापलंय. खेड-शिवापुर टोल नाक्यावर पुणे ग्रामीण पोलिसांनी पकडलेल्या रकमेबाबत पोलीस, निवडणूक विभाग आणि इन्कम टॅक्स विभागाच्या अधिकाऱ्यांनी मौन बाळगल्याचं पहायला मिळत आहे.

MH 45 - AS 2526 या गाडीतून ही रक्कम जप्त करण्यात आली आहे. या पैशांचं सांगोला कनेक्शन समोर आल्यानंतर विरोधकांनी शिंदे गटाचे आमदार शहाजीबापू पाटील यांच्यावर हल्लाबोल केला आहे. केवळ 5 कोटी रुपये दाखवले आणि उरलेले 10 कोटी झाडी डोंगरात पोहोचवले, असा घणाघात राऊतांनी केलाय. कारमधील पैशांशी माझा संबंध नाही, असं शहाजी पाटलांनी स्पष्ट केलंय.

या रोकडवरुन विरोधकांच्या हाती आयतं कोलीत मिळालंय. त्या कारमध्ये 5 कोटी नव्हे तर 17 कोटी होते, असा दावा आमदार जितेंद्र आव्हाड यांनी केलाय. तर काँग्रेसनेही महायुतीवर जोरदार हल्लाबोल केलाय. या गाडीतील व्यक्तींची नावे समोर आली आहेत. सागर सुभाष पाटील - आ. शहाजी पाटील यांचा पुतण्या

रफीक अहमह नजीर - आ. शहाजी पाटील यांचा पीए

बाळासाहेब आसबे - ठेकेदार

शशिकांत कोळी - ड्रायव्हर

खरतर राष्ट्रवादी अजित पवार पक्षाचे नेते दीपक साळुंखे ठाकरे गटात गेल्यानं सांगोल्यात राजकीय वातावरण अगोदरच तापलेलं आहे. त्यात पुण्यातील कॅश प्रकरणावरुन शहाजी पाटलांची कोंडी होणार अशी चिन्हे आहेत.