दिल्ली|ता. ९ मे २०२४

देशभरात लोकसभेचा रणसंग्राम सुरू आहे. लोकसभा निवडणुकीत ४०० पार चा नारा देत भारतीय जनता पक्षाने प्रचाराचा धडाका लावला आहे. पंतप्रधान मोदी तिसऱ्यांदा सत्तेत येणार आहेत, असा दावा भाजप नेते करत आहेत. अशातच ४ जूननंतर देशात इंडिया आघाडीची सत्ता येणार आहे, असा विश्वास व्यक्त करत मोदींच्या प्रचाराला भुलू नका, असे आवाहन राहुल गांधी यांनी केले आहे.

काय म्हणाले राहुल गांधी?

"देशाचे युवक हे देशाची ताकद आहेत. नरेंद्र मोदींच्या हातातून निवडणूक निसटत चालली आहे. त्यांनी तुमचे लक्ष भटकण्याचा निर्णय घेतला आहे. येत्या चार -पाच दिवसात काहीतरी ड्रामा करणार आहेत. मात्र तुम्ही मुद्द्यांपासून भटकू नका. बेरोजगारी सर्वात मोठा मुद्दा आहे. त्यांनी तुम्हाला आश्वासन दिलेले २ कोटी रोजगार देतील. ते खोटे बोलले. चुकीची जीएसटी लावली. नोटबंदी केली आणि अदानी अंबानीसारख्या लोकांसाठी काम केले," अशी टीका राहुल गांधी यांनी केली.

"४ जून रोजी इंडिया आघाडीचे सरकार येत आहे. आमची गॅरंटी आहे की १५ ऑगस्टपर्यंत आम्ही ३० लाख रिक्त सरकारी पदांवर भरती सुरू करणार आहोत. नरेंद्र मोदींच्या खोट्या प्रचाराला भुलू नका, तुमच्या मुद्द्यांवर ठाम राहा. इंडियाचा आवाज ऐका, तिरस्कार नको, नोकरीला स्विकारा... असे आवाहनही राहुल गांधी यांनी यावेळी केले.

दरम्यान, महायुतीच्या नेत्यांच्य प्रचारासाठी पंतप्रधान नरेंद्र मोदी पुन्हा एकदा मुंबईमध्ये जोरदार शक्तीप्रदर्शन करणार आहेत. दिनांक १५ मे रोजी पंतप्रधान नरेंद्र मोदी यांचा मुंबईमध्ये भव्य रोड शो होणार आहे. त्यानंतर १७ मे ला त्यांची जाहीर सभा होणार असून या सभेला मनसे अध्यक्ष राज ठाकरेही उपस्थित राहणार आहेत. या सभेतून पंतप्रधान कोणावर निशाणा साधणार हे पाहणे महत्वाचे ठरणार आहे.