नाशिक|ता. २९ एप्रिल २०२४

महायुतीमध्ये नाशिक लोकसभेवरुन सुरू असलेली रस्सीखेच अद्याप कायम आहे. त्यामुळे अर्ज दाखल करण्यासाठी काही दिवस उरलेले असतानाही अद्याप उमेदवाराची घोषणा करण्यात आली नाही. नाशिकमध्ये महायुतीचा उमेदवार कोण असणार? याबाबत संभ्रम कायम असतानाच शांतीगिरी महाराजांनी शिवसेनेच्या नावाने अर्ज दाखल केल्याची माहिती सुत्रांकडून मिळाली आहे. उमेदवारी जाहीर झाली नसताना शांतीगिरी महाराज यांनी शिवसेनेकडून अर्ज दाखल केल्याने मोठा ट्वीस्ट निर्माण झाला आहे.

समोर आलेल्या माहितीनुसार, नाशिक लोकसभा मतदार संघातून शांतीगिरी महाराज यांनी अपक्ष निवडणूक लढणार असल्याची घोषणा केली होती. आज शांतीगिरी महाराज यांनी आपल्या असंख्य समर्थकांसह भव्य मिरवणूक काढत आपला उमेदवारी अर्ज दाखल केला. यावेळी शहरात भव्य रॅलीसह शोभा यात्रा काढण्यात आली.

परंतु सर्वात मोठा ट्वीस्ट म्हणजे अपक्ष निवडणूक लढण्याची घोषणा केलेले शांतिगिरी महाराज यांना शिवसेना शिंदे गटाकडून उमेदवारी अर्ज दाखल केल्याचे सांगण्यात येत आहे. एकीकडे महायुतीमध्ये नाशिक लोकसभेच्या जागेवरुन रस्सीखेच सुरू आहे. अशातच शांतिगिरी महाराजांनी महायुतीकडून उमेदवारी दाखल केल्याने चर्चा रंगली आहे.

काय म्हणाले शांतीगिरी महाराज?

दरम्यान, "मी आज उमेदवारी अर्ज भरला. मात्र अजू पर्यंत कोणत्याही पक्षाचा अधिकृत एबी फॉर्म मिळालेला नाही. सध्या माझा अर्ज अपक्ष आहे. माझ्या भक्त परिवारातील जे लोक आहेत ते मुख्यमंत्री एकनाथ शिंदे यांच्याशी बोलणे झाले आहे. ते काय निर्णय घेतील यावर मी महायुतीचा उमेदवार होऊ शकतो. मात्र आज शिंदे गटाचे नाव मात्र उमेदवारी अर्जात टाकले आहे," असे शांतिगिरी महाराज यांनी स्पष्ट केले आहे.