श्रीकांत घुले

मुंबईतल्या शिवाजी पार्क मैदानावर मनसे अध्यक्ष राज ठाकरेंचीच तोफ धडाडणार आहे. मुंबई महापालिकेनं मनसेच्या अर्जाला मंजुरी दिली असून उद्धव ठाकरेंचा अर्ज नामंजूर केलाय. 17 मे रोजी ही सभा होणार असून पहिल्यांदाच राज ठाकरे आणि पंतप्रधान नरेंद्र मोदी एकाच मंचावर दिसणार आहेत. पाहुयात, यासंदर्भातला खास रिपोर्ट.

शिवाजी पार्कवरील राजकीय सभांना ऐतिहासिक परंपरा आहे. सभेसाठी शिवाजी पार्कचं मैदान मिळावं म्हणून राजकीय पक्षांमध्ये अनेकदा चढाओढ असते. शिवाजी पार्क मैदानासाठी मनसे आणि ठाकरे गट आमनेसामने आले होते. मात्र शिवाजी पार्कचं मैदान राज ठाकरेंनी मारलंय. लोकसभेच्या निवडणुकीसाठी येत्या 20 मे रोजी मुंबईत मतदान होणार आहे पंतप्रधान मोदींना बिनशर्त पाठिंबा दिल्यानंतर 17 मे रोजी मनसे महायुतीसाठी जाहीर सभा घेणार आहे. राज ठाकरे यांच्यासोबत पंतप्रधान मोदीही 17मे रोजी मनसेच्या सभेला उपस्थित राहणार असल्याची माहिती आहे.

यापूर्वी 2017 साली महापालिकेच्या निवडणुकीत शिवाजी पार्कवरून उद्धव आणि राज ठाकरेंमध्ये असाच संघर्ष रंगला होता. मात्र त्यावेळी उद्धव ठाकरेंनी बाजी मारली होती. आणि राज ठाकरेंवर रस्त्यावर सभा घेण्याची वेळ आली होती. त्यावेळी उद्धव ठाकरे भाजपसोबत होते. आता राज्यातली राजकीय समीकरणं बदलली असून राजकीय मित्र आणि शत्रूही बदलले आहेत. आता उद्धव ठाकरेंना बीकेसीच्या मैदानावर सभा घ्यावी लागणार आहे.

राज ठाकरेंनी मोदींच्या नावानं महायुतीला बिनशर्त पाठिंबा दिलाय. 17 मे रोजी होणा-या शिवाजी पार्कच्या सभेत पहिल्यांदाच राज ठाकरे आणि पंतप्रधान मोदी एका मंचावर दिसण्याची शक्यता आहे. त्यामुळे दोघांच्या निशाण्यावर कोण असणार याबाबत सा-या महाराष्ट्रालाच उत्सुकता लागलीय.