मनसे अध्यक्ष राज ठाकरे महायुतीचा प्रचार करणार की नाहीत यावरून संभ्रमाची स्थिती होती. मात्र आता हा संभ्रम दूर झाला आहे. आपण महायुतीच्या प्रचारात सहभाग घेऊ, प्रचारासाठी विचार केल्यास आपली भूमिका सकारात्मक आहे असं राज ठाकरेंनी म्हंटलंय. मात्र सभांबाबत अद्याप कोणताही निर्णय घेतलेल नाही, असंही राज ठाकरेंनी स्पष्ट केलंय. पंतप्रधान नरेंद्र मोदींना बिनशर्त पाठिंबा दिल्यानंतर आता राज ठाकरे महायुतीच्या प्रचारात सक्रिय होणार आहेत. भाजपसह शिंदे गट आणि अजित पवार गटाचा प्रचार करण्याबाबत सकारात्मक असल्याचंही राज ठाकरे म्हटलंय.

दरम्यान मोदींना पाठिंबा दिल्यानंतर राज ठाकरेंकडून घुमजावचं राजकारण केलं जात असल्याची टीका केली जातेय.. यावरून उद्धव ठाकरे आणि राज ठाकरे यांच्यातही चांगलीच जुंपलीय. दुसरीकडे भाजपने राज ठाकरेंना अशी कोणती फाईल दाखवली असा सवाल संजय राऊतांनी केला होता. यावर राज ठाकरेंनी राऊतांना प्रत्युत्तर दिलंय. राज ठाकरेंच्या सतत बदलणाऱ्या भूमिकांमुळेच मनसे नेते कीर्तिकुमार शिंदे यांनी मनसेला अलविदा केला.. मात्र आपण मोदींना पाठिंबा का दिला हे राज ठाकरेंनी पटवून देण्याचा प्रयत्न केलाय.

2024च्या लोकसभा निवडणुकीसाठी राज ठाकरे महायुतीचा प्रचार करणार हे निश्चित झालंय. 20 मेला मुंबईत लोकसभेच्या जागांसाठी मतदान होणार आहे. त्याआधी 17 मे रोजी शिवाजी पार्कात मनसेची महायुतीसाठी भव्य सभा होणार असल्याची सूत्रांची माहिती आहे. आता महायुतीच्या सभांच्या निमित्ताने मनसे अध्यक्ष राज ठाकरे आणि पंतप्रधान नरेंद्र मोदी एकाच स्टेजवर येणार का हे पाहणं महत्त्वाचं ठरणार आहे.