Satara Loksabha Constituency News:

राष्ट्रवादी शरदचंद्र पवार पक्षाकडून लोकसभेचे पाच उमेदवारी जाहीर करण्यात आले आहेत. मात्र सातारा लोकसभेसाठी अद्याप कोणताही उमेदवार देण्यात आला असून ही जागा काँग्रेसकडे जाणार असल्याची चर्चा सध्या राजकीय वर्तुळात सुरू आहे. काँग्रेसच्या तिकिटावर माजी मुख्यमंत्री पृथ्वीराज चव्हाण हे उभे राहणार असल्याचे बोलले जात आहे. यावर आता स्वतः पृथ्वीराज चव्हाण यांनी महत्वाचे विधान केले आहे. (Maharashtra loksabha Election 2024)

सातारा लोकसभा काँग्रेसकडे जाणार?

सातारा लोकसभा मतदार संघातून पृथ्वीराज चव्हाण (Prithviraj Chavan) यांना उमेदवारी मिळणार असल्याच्या चर्चा सुरु आहेत. यावर पृथ्वीराज चव्हाण यांनी खुलासा दिला आहे. "हा मतदासंघ राष्ट्रवादीकडे गेला आहे. 48 पैकी जवळजवळ सर्व जागांवर एकमत झालं आहे. सातारा मतदार संघात उमेदवार कोण असावा याबद्दल चर्चा सुरू आहे, मात्र हा मतदारसंघ राष्ट्रवादीचाच आहे, " असे त्यांनी स्पष्ट केले आहे.

काय म्हणाले पृथ्वीराज चव्हाण?

"उमेदवार कोण असेल हा निर्णय शरद पवार यांनी घ्यायचा आहे. शरद पवार जो उमेदवार देतील त्याच्या पाठीशी आम्ही पूर्ण ताकदीने मागे उभे राहू असं सांगितलं आहे. हा मतदासंघ हा 'तुतारी' चा विषय आहे. तुतारीचा निर्णय त्यांनी घ्यायचा. सातारा लोकसभा काँग्रेसने लढवावी म्हणून प्रस्ताव अजून आला नाही जर आला तर त्या प्रस्तावाचा विचार करू, राष्ट्रवादीकडून शशिकांत शिंदे यांचा निर्णय राष्ट्रवादीने घ्यायचा आहे," असेही पृथ्वीराज चव्हाण यावेळी म्हणाले.

दरम्यान, महाविकास आघाडीच्या (Mahavikas Aaghadi) जागा वाटपात काँग्रेस आणि शरद पवार गटात तडजोड होणार असल्याच्या चर्चा आहेत. सध्या शरद पवार गटाकडे असलेली साताऱ्याची जागा काँग्रेसला देऊन त्याबदल्यात भिवंडीची जागा राष्ट्रवादीकडे जाणार असल्याचे बोलले जात आहे. सातारा लोकसभा शरद पवार गटाकडेच राहिल्यास उमेदवारीसाठी बाळासाहेब पाटील किंवा शशिकांत शिंदे यांच्या नावाची चर्चा आहे.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)