सुशिल थोरात, अहमदनगर|ता. ४ मे २०२४

राज्यात सध्या लोकसभेचा रणसंग्राम सुरू आहे. लोकसभेच्या रणांगणात उतरलेल्या नेत्यांकडून प्रचार सभा, रॅलींचा धडाका सुरू आहे. अशातच महाविकास आघाडीचे नगर दक्षिणचे उमेदवार निलेश लंके यांच्या प्रचार रॅलीत एका कुटुंबाला मारहाण झाल्याचे समोर आले आहे. ही मारहण निलेश लंकें यांच्या कार्यकर्त्यांकडून करण्यात आल्याचा आरोप सुजय विखेंकडून करण्यात आला आहे. यावरुन आता नगरमध्ये राजकीय वातावरण चांगलेच तापले आहे.

प्रचार रॅलीत मारहाण..

याबाबत समोर आलेल्या माहितीनुसार, अहमदनगर शहरातील शिवाजीनगर परिसरात प्रचार फेरी दरम्यान एका कुटुंबाला मारहाण झाल्याची घटना घडली. प्रचार फेरी सुरू असताना गाडीला रस्ता देण्यासाठी विनंती केली असता वाद होऊन ही मारहाण झाल्याचे सांगण्यात येत आहे. यामध्ये एक वृद्ध महिला जखमी झाली असून त्यांच्यावर रुग्णालयात उपचार सुरू आहेत.

सुजय विखेंचे गंभीर आरोप..

यावरुन आता महाविकास आघाडीचे उमेदवार निलेश लंके आणि महायुतीचे उमेदवार सुजय विखे पाटील यांच्यामध्ये आरोप- प्रत्यारोप सुरू झालेत. ही मारहाण निलेश लंके यांच्या कार्यकर्त्यांकडून करण्यात आल्याचा आरोप सुजय विखे यांनी केला आहे. तसेच पोलिसांना दम दिला तेव्हाच पोलिसांनी कारवाई करायला हवी होती. ती कारवाई न केल्याने कार्यकर्त्यांचे मनोबल वाढलं अस सुजय विखे यांनी म्हटलं आहे. याबाबत आम्ही निवडणूक आयोगाकडे तक्रार करणार असल्याचा इशारा सुजय विखे यांनी दिला आहे.

दरम्यान, सुजय विखेंचे हे आरोप फेटाळून लावत मारहाणीचा आमचा कोणताही संबंध नसल्याचे निलेश लंके यांनी म्हटलं आहे. आम्हालाच त्रास देऊन पुन्हा आमच्यावर आरोप करतात असे म्हणत पोलिस आणि महसूल विभागाचा वापर करून आमच्या कार्यकर्त्यांना त्रास देत असल्याचा आरोप लंके यांनी केला आहे.