सचिन गाड, मुंबई|ता. २३ एप्रिल २०२४

लोकसभा निवडणुकांची घोषणा होऊन आठवडे उलटल्यानंतरही महायुतीमध्ये जागा वाटपाचा तिढा सुटत नसल्याचे दिसत आहे. नाशिक लोकसभेच्या जागेवरुन शिवसेना शिंदे- गट तसेच भाजपमध्ये रस्सीखेच सुरू आहे. अशातच आज रात्री नाशिकचे खासदार हेमंत गोडसे आणि अजय बोरस्ते आणि स्थानिक पदाधिकाऱ्यांनी यांनी मुख्यमंत्री एकनाथ शिंदेंची भेट घेतल्याचे समोर आले आहे. त्यामुळे नाशिकचा तिढा लवकरच संपण्याची चिन्हे दिसत आहेत.

राष्ट्रवादीचे नेते छगन भुजबळ (Chhagan Bhujbal) यांनी माघार घेतल्यानंतर नाशिक लोकसभेत शिवसेना शिंदे गटाचा मार्ग मोकळा झाला आहे. मात्र नाशिकमध्ये खासदार हेमंत गोडसे आणि अजय बोरस्ते या दोघांच्याही नावाची चर्चा आहे. त्यामुळे उमेदवारी नेमकी कोणाला मिळणार? याबाबत अद्याप संभ्रम कायम आहे.अशातच नाशिकचे खासदार हेमंत गोडसे, अजय बोरस्ते आणि स्थानिक पदाधिकाऱ्यांनी मुख्यमंत्री एकनाथ शिंदे (CM Eknath Shinde) यांची रात्री उशिरा ठाण्यातील निवासस्थानी भेट घेतली.

या बैठकीत नाशिकची उमेदवारी हेमंत गोडसे यांना देण्याबाबत चर्चा झाल्याचे सांगण्यात येत आहे. त्यामुळे येत्या दोन दिवसात हेमंत गोडसे यांच्या नावाची घोषणा होण्याची शक्यता आहे. तसेच मुख्यमंत्री एकनाथ शिंदे यांचे शिवसेनेच्या पदाधिकाऱ्यांना ताकदीने कामाला लागण्याचे आदेशही दिल्याचे सांगण्यात येत आहे.

त्याचबरोबर मुंबईमधील उत्तर पश्चिम मतदार संघातील शिवसेनेचे आमदार रविंद्र वायकर (Ravindra Waykar) यांनी देखील रात्री उशीरा मुख्यमंत्री एकनाथ शिंदे यांची भेट घेतली. या मतदार संघातून रविंद्र वायकर यांना लोकसभेची उमेदवारी मिळण्याची चिन्हे आहेत. त्यामुळे वायकर यांनी एकनाथ शिंदे यांची भेट घेतल्याचे सांगण्यात येत आहे.