नाशिक|ता. ६ मे २०२४

नाशिक लोकसभेसाठी उमेदवारी अर्ज माघार घेण्याचा आजचा शेवटचा दिवस. त्यामुळे महायुतीमध्ये बंडखोरी केलेले भाजप नेते अनिल जाधव उमेदवारी अर्ज माघार घेणार का? याकडे नेत्यांचे लक्ष लागले होते. अखेर अर्ज माघार घेण्यासाठी अवघा एक मिनिट शिल्लक असताना अनिल जाधव धावत पळत जिल्हाधिकारी कार्यालयात पोहोचले अन् हेमंत गोडसेंनी सुटकेचा नि:श्वास सोडला. यावेळी महायुतीच्या नेते, पदाधिकाऱ्यांची चांगलीच धावपळ झाल्याचे पाहायला मिळाले.

नाशिक लोकसभा मतदार संघात महायुतीकडून शिवसेना शिंदे गटाचे हेमंत गोडसे यांना पुन्हा उमेदवारी देण्यात आली आहे. मात्र भाजप नेते अनिल जाधव यांनी बंडखोरी करत अपक्ष उमेदवारी अर्ज दाखल केला होता. आज उमेदवारी अर्ज माघार घेण्याचा शेवटचा दिवस होता. त्यामुळे अनिल जाधव यांच्या भूमिकेकडे सर्वांचे लक्ष लागले होते. अनिल जाधव हे अर्ज माघार घेणार असल्याचे सांगण्यात येत होते.

मात्र अनिल जाधव अद्याप जिल्हाधिकारी कार्यालयात पोहोचले नसल्याने हेमंत गोडसे यांना ताटकळत उभे राहावे लागले. अखेर माघार घेण्यासाठी अवघा १ मिनिट शिल्लक असताना अनिल जाधव पोहोचले. त्यानंतर हेमंत गोडसे, अनिल जाधव यांच्यासह पदाधिकाऱ्यांना अक्षरशः धावत जिल्हाधिकाऱ्यांच्या दालनात जावे लागले. यावेळी महायुतीचे कार्यकर्ते, बंडखोर अनिल जाधव अन् उमेदवार हेमंत गोडसे यांची चांगलीच दमछाक झाल्याचे पाहायला मिळाले.

दरम्यान, नाशिक लोकसभेतून अपक्ष निवडणुकीच्या रिंगणात उतरलेले महंत शांतीगिरी महाराजांची मनधरणी करण्यात महायुतीच्या नेत्यांना अपयश आले आहे. शांतीगिरी महाराजांनी आपला उमेदवारी अर्ज कायम ठेवला आहे. त्यामुळे महायुतीच्या नेत्यांचे टेन्शन चांगलेच वाढले आहे. महायुतीनेच मला पाठिंबा द्यावा, अशी भूमिका घेत शांतीगिरी महाराजांनी कोणत्याही परिस्थितीत निवडणूक लढणार असल्याचे स्पष्ट केले आहे.