अभिजित देशमुख

कल्याण-डोबिंवली : लोकसभा निवडणुकीच्या पार्श्वभूमीवर कल्याण डोंबिवलीतील राजकीय वातावरण तापू लागले आहे. येत्या २० मे रोजी मतदान होणार असून प्रचारासाठी अवघे ८ दिवस हातात आहेत. या पार्श्वभूमीवर येत्या आठवडाभरात कल्याण डोंबिवलीमध्ये महायुती आणि महाविकास आघाडीच्या दिग्गज नेत्यांच्या जाहीर सभांचा धुरळा उडणार आहे.

उद्या १२ मे रोजी रविवारी भिवंडी लोकसभा मतदारसंघातील महाविकास आघाडीचे उमेदवार सुरेश उर्फ बाळ्या मामा म्हात्रे यांच्या प्रचारासाठी शरद पवार यांची कल्याण पश्चिमेतील यशवंतराव क्रीडांगण येथे संध्याकाळी ६ वाजता त्यांची जाहीर सभा होणार आहे. त्यापाठोपाठ सोमवारी १३ मे रोजी कल्याण लोकसभा मतदारसंघातील महाविकास आघाडीच्या उमेदवार वैशाली दरेकर यांच्या प्रचारासाठी डोंबिवली पश्चिमेकडील भागशाळा मैदानात उद्धव ठाकरे यांची जाहीर सभा होणार आहे. तर ठाकरेंच्या सभेच्या एक दिवसानंतर म्हणजेच १४ मे रोजी पंतप्रधान नरेंद्र मोदी यांची कल्याण पश्चिमेला जाहीर सभा होणार आहे.

भिवंडी लोकसभा मतदारसंघातील महायुतीचे उमेदवार कपिल पाटील आणि कल्याण लोकसभा मतदारसंघातील उमेदवार डॉ. श्रीकांत शिंदे यांच्या प्रचारासाठी पंतप्रधान मोदी यांची सभा होत आहे. या तिन्ही दिग्गज नेत्यांच्या जाहीर सभांमुळे काळात कल्याण डोंबिवलीतील राजकीय वातावरणही चांगलेच ढवळून निघणार आहे.