विनोद जिरे, बीड

'पंकजा मुंडेंना मतदान केलं नाही, तिला निवडून दिलं नाही तर मी राजीनामा देईल.', असे वक्तव्य भाजपचे नेते आणि सातारा लोकसभा मतदारसंघाचे महायुतीचे उमेदवार उदयनराजे भोसले यांनी केले आहे. पंकजा मुंडे (Pankaja Munde) यांना निवडून द्या असे आवाहन त्यांनी बीडकरांना केले आहे. पंकजा मुंडे यांच्या प्रचारासाठी बीडमध्ये उदयनराजे भोसले (Udayanraje Bhosale) यांच्या सभेचे आयोजन करण्यात आले होते.

उदयनराजे भोसले यांनी सांगितले की, मी मनापासून सांगतो पंकजा मुंडेंना मतदान केलं नाही, तिला जर निवडून दिलं नाही, तर मी राजीनामा देईल आणि पंकजाला माझ्या तिथून निवडून आणेन हे लक्षात ठेवा. पण तसं होत नाही. मी येतांना बघत होतो. चोहो बाजूंनी कंपाऊंडला कुलूप लावतो. हो म्हणालात तर सोडतो. नाहीतर नाही सोडत.', असे म्हणत उदयनराजेंनी बीडकरांना पंकजा मुंडेंना मतदान करण्याचे आवाहन केले.

'एका जीवाभावाच्या व्यक्तीला मदत करायची की नाही. तिला संधी मिळाली पाहिजे की नाही? ती काळ्याची पांढरी झाल्यानंतर तिला संधी मिळणार का?', असा सवाल उदयनराजे यांनी बीडकरांना केला. तसंच, 'मी कुणाचे कौतुक करायला आलो नाही. महाराजांचे नाव घेऊन ते विकास करत आहेत. गरिबी हटाव म्हणून काम करत आहेत.', असे देखील त्यांनी सांगितले.

तसंच, 'एक सांगतो कृपा करा, माझ्या बहिणीला निवडून द्या. तलवार उपसा आता. मी आलो हिच्याकरता नीट वागा. आता वाकून नमस्कार करतो तुम्हाला. तुमचं आमचं नातं काय जय भवानी जय शिवराय.' असे त्यांनी यावेळी सांगितले. यावेळी उदयनराजे भोसले बीडकरांसमोर नतमस्तक झाले. तसंच भावुक होत त्यांनी तुम्ही पंकजाला निवडून देणार ना?, असा सवाल केला. यासोबतच, 'तिला निवडून देणार का? मी माझ्याजाग्यावर तिला निवडून आणतो. मग बघतो तुमच्याकडे.', असे म्हणत त्यांनी बीडकरांना दम दिला.