प्रत्येक भारतीय रहिवाशांच्या आहारामध्ये बटाट्याचा समावेश केला जातो. प्रत्येकाच्या स्वयंपाक घरात बटाटा हा भाज्यांमधील महत्वाचा घटक मानला जातो. त्यामुळे बाजारात गेल्यावर बटाट्याची खरेदी केली जाते. बऱ्याच वेळेस आपण जास्त बटाटे घरात आणून ठेवतो. भाजी, नाश्ता किंवा वेगवेगळ्या पदार्थांमध्ये त्याचा वापर मोठ्या प्रमाणावर केला जातो. मात्र काही वेळाने जेव्हा बटाट्यांना अंकुर फुटतात, तेव्हा ते शरीरासाठी धोकादायक ठरू शकतात.

अंकुरलेल्या किंवा मोड आलेल्या बटाट्यांमध्ये "सोलानाइन" नावाचा विषारी घटक तयार होतो. या घटकाचे जास्त प्रमाण शरीरात गेल्यास उलट्या, जुलाब, डोकेदुखी, पोटदुखी, चक्कर येणे आणि गंभीर प्रकरणांमध्ये मज्जासंस्थेला हानी पोहोचवू शकते, असा इशारा तज्ज्ञ देतात.

आहारतज्ज्ञ सांगतात की, जर बटाट्याला थोडेसे अंकुर आले असतील आणि त्यावर हिरवे डाग नसतील तर तो वापरता येऊ शकतो. त्यामुळे बाजारातून बटाटे विकत आणताना तुम्ही ही काळजी घेणे आवश्यक आहे. मात्र, अंकुर व आजूबाजूचा भाग कापून टाकणे आवश्यक आहे. शिजवण्यापूर्वी बटाटा सोलून चांगले धुतल्यास धोका कमी होतो. परंतु जर बटाट्यावर मोठ्या प्रमाणात हिरवे डाग असतील, त्याला वास येत असेल किंवा तो खूप मऊ झाला असेल तर तो अजिबात वापरू नका. त्याने तु्म्हाला पोटासंबंधीत आणखी समस्यांना सामोरे जावे लागेल.

तज्ज्ञांच्या मते, बटाटे थंड, कोरड्या आणि हवेशीर जागी ठेवले पाहिजेत. बटाटे फ्रीजमध्ये ठेवू नयेत कारण ओलावा वाढल्याने अंकुर लवकर फुटतात. तसेच, कांद्यासोबत बटाटे ठेवल्यास कांद्यामुळे निघणाऱ्या वायूमुळेही अंकुर येण्याची प्रक्रिया जलद होते. थोडे अंकुरलेले बटाटे काळजीपूर्वक वापरले जाऊ शकतात, मात्र आरोग्याला निर्माण होणारा धोका टाळण्यासाठी खूपच मोड आलेले आणि हिरवे पडलेले बटाटे फेकून देणे योग्य ठरेल.