मधुमेह, म्हणजेच डायबिटीज हा एक असा आजार आहे की एकदा झाला की त्यावर कोणताही उपचार नाही. यावर पूर्णपणे इलाज नाही पण नियंत्रण ठेवणं शक्य आहे. शरीरात साखरेचं प्रमाण म्हणजेच ब्लड शुगर खूप जास्त किंवा खूप कमी झालं तर अनेक अवयवांवर त्याचा गंभीर परिणाम होऊ शकतो.

मात्र आपल्याला कोणताही गंभीर त्रास होण्यापूर्वी शरीर आपल्याला त्याचे संकेत देत असतं. मुळात ही लक्षणं जाणून घेणं फार महत्त्वाचं असतं. मधुमेहाची अशी काही लक्षणं आहेत जी तुम्हाला टेस्ट न करताही समजू शकतात.

नजर कमजोर होणं

जर तुम्हाला हल्ली अचानक कमी दिसत असेल, धूसर दिसणं किंवा एकदम चष्म्याचा नंबर बदलल्यासारखं वाटत असेल, तर हे डायबिटीजचं एक महत्त्वाचं लक्षण असू शकतं. रक्तातील साखरेचं प्रमाण वाढलं की डोळ्यांच्या आतल्या लेन्समध्ये सूज येते. त्यामुळे दृष्टि स्पष्ट राहात नाही.

झोप घेतल्यानंतर थकवा जाणवणं

तुम्ही रात्री भरपूर झोप घेतली तरी दिवसभर थकवा जाणवतोय का? सतत अशक्तपणा वाटतोय का? तर हे देखील डायबिटीजचं सुरुवातीचं लक्षण असू शकतं. शरीरात ग्लूकोज (साखर) योग्य प्रकारे पेशींमध्ये पोहोचत नाही आणि शरीराला आवश्यक ऊर्जा मिळत नाही. त्यामुळे काम करतानाअशक्तपणा जाणवू शकतो.

वारंवार लघवी होणं

शरीरात साखरेचं प्रमाण जास्त झालं की किडनी ती साखर लघवीद्वारे बाहेर टाकण्याचा प्रयत्न करते. त्यामुळे तुम्हाला वारंवार लघवी लागते, विशेषतः रात्री झोपेतून उठून बाथरूमला जावं लागतं. काही वेळा पाणी जास्त प्यायल्यामुळे असं होतं, पण जर तुम्ही पाणी फारसं न पिता देखील वारंवार लघवी लागतेय, तर हे निश्चितच तपासून पाहण्यासारखं आहे.

खूप तहान लागणं

जर तुम्हाला सारखी तहान लागत असेल पाणी प्यायल्यावरही तहान भागत नसेल तर हे डायबेटीजचं लक्षण असतं. कारण जेव्हा वारंवार लघवी होते तेव्हा शरीरातून बऱ्याच प्रमाणात पाणीही बाहेर पडतं. त्यामुळे शरीरात डिहायड्रेशन होऊ लागतं.

खाल्ल्यावर लगेच भूक लागणं

जर तुम्ही नीट जेवल्यानंतरही लगेच पुन्हा भूक लागत असेल तर हे देखील डायबिटीजचं लक्षण आहे. यामागे कारण असं आहे की, शरीरात ग्लूकोज असूनही ते पेशींमध्ये नीट पोहोचत नाही, त्यामुळे पेशींना ऊर्जा मिळत नाही.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत