बरेचलोक त्यांच्या खिडकीत, बाल्कनीत आणि टॅरेसवर येणाऱ्या कबुतरांना अक्षरश: वैतागले आहेत. ते सगळीकडे दुर्गंधी आणि अस्वच्छता पसरवतात. शिवाय धान्य खातात त्यामुळे बाहेर वाळवणं घालणं सुद्धा कठिण होते. एका अभ्यासातून समोर आले आहे की, कबुतरांची विष्ठा आरोग्यासाठी अनेक समस्या निर्माण करते. यामुळे श्वसनाचे आजार, फुफ्फुसाचे आजार आणि इतर आरोग्य समस्या निर्माण होऊ शकतात. यापासुन वाचण्यासाठी आणि कबुतरांना तुमच्या बाल्कनीत येण्यापासुन रोखण्यासाठी तुम्ही काही सोप्या ट्रिक्स वापरू शकता.

कबुतर असा पक्षी आहे ज्याला अंधाऱ्या आणि दमट वातावरण असलेल्या ठिकाणी रहायला आवडतं. त्यामुळे सर्वप्रथम बाल्कनीमध्ये उजेड आणि कोरडेपणा राहील अशी व्यवस्था करा. तुमच्या घरात एखादी जुनी सीडी म्हणजेच कॉम्पॅक्ट डिस्क असेल तर ती एका दोऱ्याच्या मदतीने खिडकीत किंवा बाल्कनीत अडकवा. कबुतरांना चमकदार वस्तू आवडत नाहीत त्यामुळे ते लांब राहतील. सीडी नसेल तर त्याऐवजी तुम्ही एल्युमिनियम फॉयल वापरू शकता. एल्युमिनियम फॉयलचे काही तुकडे बाल्कनीमध्ये पसरवून ठेवा. किंवा फॉयलचे तुकडे एकत्र करून गोळा तयार करा आणि दोऱ्याच्या मदतीने तो तुमच्या खिडकीत किंवा बाल्कनीत अडकवा.

शक्य असल्यास बाल्कनीला जाळी बसवून घेऊ शकता. किंवा बर्ड स्पाइक लावा. जाळी लावल्याने कबूतर आत येऊ शकणार नाहीत. तसेच स्पाइकमुळे कबुतरांना तिथे बसणे व घरटे बांधणे कठिण होईल. शिवाय कबुतरांना मसाल्यांचा तीव्र वास सहन होत नाही. यासाठी तुम्ही बाल्कनीत किंवा खिडकीमध्ये लाल तिखट, काळी मिरी किंवा दालचीनी यासारखे तीव्र वासाचे मसाले एका वाटीत भरून ठेवू शकता.

तुम्ही तुमच्या बाल्कनीत विंड चाइम्स लावू शकता. यामुळे बाल्कनीची शोभाही वाढेल आणि कबुतरांपासुन सुटका देखील मिळेल. विंड चाइम्सचा मंद किणकिण आवाज आपल्यासाठी शांतता देणारा असला तरी कबुतर या आवाजाला घाबरतात. याशिवाय मसाल्यांप्रमाणे असे काही तीव्र वासाचे इसेन्शियल तेल आहेत ज्यांच्या वासाने कबुतर लांब पळतात. यासाठी यूकेलिप्टस, टी ट्री, पेपरमेंट यांसारख्या तीव्र वासाच्या तेलांचे काही थेंब पाण्यात मिसळा. आणि एका स्प्रे बॉटलच्या मदतीने ते पाणी कबुतर येण्याच्या ठिकाणी स्प्रे करा.