Smoking Affect Lung :

चहा टपरीवर किंवा पानपट्टीवर सिगारेटचा धूर उडताना आपण सहज पाहातो. सिगारेट ओढणे आपल्या आरोग्यासाठी अधिक घातक आहे. अनेकजण तणावापासून सुटका मिळवण्यासाठी धुम्रपान करतात.

सिगारेटमध्ये तंबाखू असते, त्यात असणारे निकोटीन नावाच्या पदार्थामुळे तुम्हाला व्यसन लागते. सिगारेटच्या धुराने आपल्या शरीरात प्रवेश केल्याने मेंदू आणि मज्जातंतूंवर परिणाम होतो. ज्यामुळे काही वेळेसाठी आपल्याला बरे वाटते. परंतु, याची एकदा सवय लागली की, आपल्याला वारंवार करण्याची इच्छा होते. त्यामुळे आरोग्यावर विपरीत परिणाम होतो.

सिगारेटच्या धुरामधून अनेक खराब आणि धोकादायक वायू बाहेर पडतात. ज्यामध्ये कार्बन मोनोऑक्साइड, सल्फर ऑक्साईड आणि इतर वायूंचा समावेश असतो. ज्यामुळे हे श्वसननलिकेच्या आतून फुफ्फुसांवर परिणाम करतात. यात सीपीओडीसोबत दम्याची लक्षणे उद्भवतात. त्यामुळे कर्करोगासारखा (Cancer) गंभीर आजार (Disease) होण्याची शक्यता असते.

धुम्रपान केल्यामुळे फुफ्फुसांवर परिणाम होतो. यात असणारे कण शरीरात खोलवर पोहोचतात आणि रक्तवाहिन्यांमध्ये प्रवेश करतात. ज्यामुळे ब्लॉकेज तयार होतात. त्यामुळे हृदयविकाराचा झटका (Heart attack) आणि पक्षाघाताचा धोका वाढतो.

जर महिलावर्ग धुम्रपान करत असतील तर त्यांना देखील अनेक समस्यांना सामोरे जावे लागते. यामुळे प्रजनन क्षमतेवर विपरीत परिणाम होतो. त्यामुळे वंध्यत्व येते. तसेच भविष्यात गर्भधारणा करण्यासाठी अनेक अडचणी येऊ शकतात. फुफ्फुसाचे नुकसान झाल्यामुळे थकवा जाणवणे, श्लेष्मा, अंगदुखी, खोकला येणे, अचानक वजन कमी होणे, दम्याचा त्रास उद्भवू शकतो. यासाठी वेळीच डॉक्टरांचा सल्ला घ्या.

डिस्क्लेमर: सदर लेख फक्त सामान्य माहितीसाठी आहे. अधिक तपशीलांसाठी नेहमी आपल्या डॉक्टरांशी संपर्क साधा.