किडनी हा आपल्या शरीरातील अतिशय महत्त्वाचा अवयव आहे. किडनी रक्त शुद्ध करून त्यातील अतिरिक्त पाणी आणि अपायकारक घटक बाहेर काढण्याचं काम करते. पण अनेक वेळा किडनीमध्ये छोटे-छोटे कण तयार होतात, ज्यांना ‘किडनी स्टोन’ म्हणतात. हे आकाराने कधी वाळूच्या कणाएवढे लहान असू शकतात, तर कधी छोट्या दगडाऐवढे मोठेही असतात.

वेळेत उपचार न केल्यास हे खूप तीव्र वेदना निर्माण करू शकतात. या स्टोनमुळे तुम्हाला गंभीर त्रास होण्याची शक्यता आहे. या स्टोनची कोणती लक्षणं दिसून येतात ते पाहूयात.

किडनी स्टोनची लक्षणं

• तीव्र वेदना- पाठीत, कंबरेत किंवा पोटाच्या खालच्या भागात अचानक व असह्य वेदना होणं.

• लघवी करताना वेदना- लघवी करताना जळजळ किंवा चुरचुर जाणवणं.

• लघवीचा रंग बदलणं – लघवी लाल, गुलाबी किंवा तपकिरी होणं, जे लघवीत रक्त येण्यामुळे होऊ शकतं.

• वारंवार लघवी लागणं– विशेषत: रात्री वारंवार लघवीची गरज भासणं.

• लघवीला दुर्गंधी येणं– लघवीला दुर्गंधी येणं किंवा ती गढूळ दिसणं.

• उलटी किंवा मळमळ– वेदनांसोबत मळमळ होणं किंवा उलटी होणं.

• ताप आणि थंडी वाजणं– स्टोनमुळे संसर्ग झाल्यास ताप येणं व अंगाला थंडी वाजणं.

तज्ज्ञांच्या म्हणण्यानुसार, "किडनी स्टोन ही एक सामान्य समस्या आहे पण योग्य जीवनशैली आणि आहारातील बदलांमुळे ती टाळता येऊ शकते. वेळेवर पाणी पिणं, संतुलित आहार घेणं आणि जास्त मीठ तसंच प्रोसेस्ड फूडपासून दूर राहणं आवश्यक आहे. जर तीव्र वेदना, लघवीत रक्त अशी लक्षणे दिसली, तर तात्काळ डॉक्टरांचा सल्ला घ्यावा."

डॉक्टरांची मदत कधी घ्यावी?

जर वेदना खूपच वाढल्या, लघवीत रक्त दिसले, ताप आला तर उशीर न करता डॉक्टरांकडे जावं. काही वेळा लहान स्टोन आपोआप लघवीबरोबर बाहेर पडतात, पण मोठ्या स्टोनसाठी औषधोपचार किंवा शस्त्रक्रियेची गरज भासू शकते.

किडनी स्टोन टाळण्यासाठी उपाय

• पुरेसे पाणी प्या – दिवसाला किमान ८-१० ग्लास पाणी प्यावे.

• मीठ व जंक फूड कमी करा – जास्त सोडियम व प्रोसेस्ड फूड किडनी स्टोनचा धोका वाढवतात.

• संतुलित आहार घ्या – कॅल्शियम, मॅग्नेशियम आणि फायबरयुक्त अन्न आहारात समाविष्ट करा.

• लघवी रोखू नका – लांब वेळ लघवी रोखल्याने धोका वाढू शकतो.

• नियमित आरोग्य तपासणी करा – पूर्वी किडनी स्टोन झाला असल्यास वेळोवेळी तपासणी करून घ्यावी.

किडनी स्टोन ही अशी समस्या आहे, जी योग्य आहार, पुरेसं पाणी आणि वेळोवेळी तपासणी यामुळे बऱ्याच प्रमाणात टाळता येते. लक्षणं दिसल्यास दुर्लक्ष न करता त्वरित तज्ज्ञांचा सल्ला घ्या.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.