वजन कमी करणे हे आजच्या धकाधकीच्या जीवनात खूपच मोठं आव्हान आहे. रोजच्या जेवणात काय खावं आणि काय टाळावं, याबाबत सल्ल्यांची भरमार असली तरी, अनेकदा योग्य माहिती नसल्यामुळे प्रयत्न अयशस्वी होतात. मात्र अलीकडेच एका महिलेने केवळ ७ महिन्यांत ३५ किलो वजन कमी केल्याची एक पोस्ट सोशल मीडियावर व्हायरल झाली असून, अनेकांसाठी ती प्रेरणादायी ठरत आहे. विशेष म्हणजे या महिलेने वजन कमी करण्यासाठी कोणताही कठोर व्यायाम किंवा महागडा आहार पाळलेला नाही. ती म्हणते की, वजन कमी करण्यासाठी तिने काही पदार्थ खाणं पूर्णतः थांबवलं, हेच तिचं यशाचं एक गुपित आहे. तिच्या या शरीरपरिवर्तनाचा व्हिडिओ तिने तिच्या इंस्टाग्राम अकाउंटवर शेअर केला असून, त्यात 'पूर्वी आणि नंतर' असे फोटोही आहेत.

सुरुवातीच्या फोटोंमध्ये तिचं शरीर स्थूल वाटत होतं. मात्र नंतरच्या फोटोंमध्ये ती एकदम सडपातळ, तंदुरुस्त आणि आत्मविश्वासाने भरलेली दिसते. व्हिडिओमध्ये तिने स्पष्ट केलं की तिने काही विशिष्ट अन्नपदार्थ टाळले आणि त्याचा सकारात्मक परिणाम शरीरावर दिसू लागला. वजन कमी करण्यासाठी तिने सगळ्यात आधी आपल्या आहारातून ग्रॅनोला, फ्लेवर्ड दही आणि पॅकेज्ड फळांचे रस काढून टाकले. ही सर्व खाद्यपदार्थ ‘निरोगी’ म्हणून विकले जात असले, तरी त्यात लपलेली साखर आणि तेल शरीरासाठी हानिकारक ठरू शकतात.

तिने इतरही प्रक्रिया केलेले पदार्थ जसे की, डाएट नमकीन, बेक्ड चिप्स, प्रोटीन बार, मध, गूळ, ब्राऊन ब्रेड, स्मूदीज, लो-फॅट पॅकेज्ड अन्न आणि अतिसेवनात घेतलेले सोया उत्पादने टाळली. तिच्या म्हणण्यानुसार, वजन कमी करण्यासाठी केवळ फॅटी फूड कमी करणे पुरेसे नाही, तर काय खातोय आणि त्यात काय मिसळलं आहे, हे समजून घेणं महत्त्वाचं आहे.

या महिलेचा आहार नियंत्रित होता, पण त्याचवेळी संतुलितही होता. वजन कमी करताना ती उपाशी राहत नव्हती, तर चुकीच्या पदार्थांचे सेवन थांबवून ती योग्य पर्याय निवडत होती. इंटरनेटवर मिळणाऱ्या लाखो सल्ल्यांपेक्षा स्वतःच्या शरीराचा अभ्यास करून आणि साधे नियम पाळून तिने मिळवलेलं यश अनेकांना प्रेरणा देणारं आहे.