प्रत्येक महिलेचे आई होण्याचे स्वप्न असते. आई होण्यासाठी महिलेला ९ महिने स्वत:ला खूप जपावे लागते. कारण बाळंतपण हा प्रत्येक महिलेच्या आयुष्यातील सर्वात मोठा टप्पा मानला जातो. मात्र या काळानंतर अनेक महिलांना शारीरिक तसेच मानसिक अडचणींचा सामना करावा लागतो. पाठदुखी, पोटदुखी, सांध्यातील वेदना, स्नायू सैल होणे अशा समस्या सामान्य आहेत. याचबरोबर काही महिलांना Postpartum Depression चा त्रासही होतो. तज्ज्ञांच्या मते, अशा वेळी योग्य फिजिओथेरपी केल्यास महिलांचे आरोग्य लवकर सुधारू शकते.

आज म्हणजेच ८ सप्टेंबर रोजी जागतिक भौतिकउपचार दिन( World Physiotherapy Day)साजरा केला जातो. यावर्षी या दिवसाची संकल्पना 'हेल्दी एजिंग' अशी आहे. भौतिकउपचाराचा वापर गर्भवती महिलांसाठी अत्यंत आवश्यक मानला जातो. फिजिओथेरपिस्ट सांगतात की, बाळंतपणानंतर शरीरातील हार्मोन्समध्ये मोठे बदल होतात. यामुळे शारीरिक कमजोरी, थकवा आणि वेदना जाणवतात. फिजिओथेरपीतील पेल्विक फ्लोर वर्कआउट्स महिलांसाठी विशेष फायदेशीर ठरतात. या व्यायामामुळे स्नायू मजबूत होतात, मूत्रसंस्थेवरील ताण कमी होतो आणि शरीर मुळ अवस्थेत येते.

याशिवाय साधे श्वसन व्यायाम, हलके स्ट्रेचिंग, योगासने यांचा समावेश केल्यास मानसिक तणाव कमी होतो. तज्ज्ञांच्या मते, यामुळे Postpartum depression वरही सकारात्मक परिणाम होतो. नियमित फिजिओथेरपीमुळे आईला पुन्हा ऊर्जा मिळते आणि दैनंदिन कामे सहज पार पाडता येतात.

आरोग्यतज्ज्ञांचा सल्ला असा आहे की, बाळंतपणानंतर महिलांनी स्वतःची काळजी घेणे तितकेच आवश्यक आहे जितके बाळाची. योग्य वेळी फिजिओथेरपिस्टचा सल्ला घेतल्यास दीर्घकाळ टिकणाऱ्या वेदना किंवा मानसिक समस्यांपासून आराम मिळू शकतो. त्यामुळे महिलांनी हा उपचार भाग आपल्या जीवनशैलीत नक्कीच सामील करावा.