दिवसभर कामासाठी पोटापाण्यासाठी धावपळ केल्यानंतर शरीर, मेंदू आणि मनाला विश्रांतीची गरज असते. दुसऱ्या दिवशी पुन्हा एनर्जीने काम करण्यासाठी तुम्हाला झोप आवश्यक आहेच. पण या धावपळीत तुम्हाला जर कमी झोप मिळत असेल तर तुम्ही नकळत तुमच्या आरोग्याचं नुकसान करून घेत आहात. झोप ही ईच्छेवर अवलंबून नसून ती आरोग्यासाठी खूप आवश्यक आहे. असं संशोधनांमधून असं स्पष्ट झालंय.

तज्ज्ञांच्या मते, फक्त लहान मुलांनाच नाही तर प्रौढांना सुद्धा पुरेशी झोप गरजेची असते. तुमच्या जन्मापासून म्हातारपणापर्यंत यात खूप बदल होतात. नुकत्याच जन्मलेल्या बाळांना दररोज १४ ते १७ तासांची झोप हवी असते आणि ही झोप थोड्या थोड्या वेळाची असते. याला तुटक स्वरुपाची सुद्धा म्हणू शकतो.

चार ते अकरा महिन्यांच्या बाळांना रात्री थोडी सलग झोप मिळायला सुरुवात होते. हे वय तुटक स्वरुपाची झोप कमी करतं. तरीही दिवसा झोपणं आवश्यक असतं. एक ते दोन वर्षांच्या लहान मुलांसाठी ११ ते १४ तासांची झोप आवश्यक असते. तीन ते पाच वर्षांच्या मुलांमध्ये डुलकी कमी होत जाते, त्यामुळे ठराविक वेळेची झोपेची सवय फायदेशीर ठरते.

सहा ते बारा वयोगटातील मुलांसाठी ९ ते १२ तासांची झोप स्मरणशक्ती आणि शारीरिक वाढीसाठी आवश्यक असते. तेरा ते अठरा वयोगटातील किशोरवयीन मुलांना शरीरघड्याळ उशिरा झोपण्याची सवय लावतं. तरी त्यांना ८ ते १० तासांची झोप गरजेची असते. अठरा ते ६४ वयोगटातील प्रौढांसाठी ७ ते ९ तासांची झोप गरजेची असते. पंच्याहत्तर वर्षांनंतर झोप हलकी होत असली तरी सात ते आठ तासांची झोप मेंदूच्या आरोग्यासाठी आणि प्रतिकारशक्तीसाठी अत्यंत आवश्यक असल्याचं तज्ज्ञ सांगतात.

चांगली झोप मिळण्यासाठी दररोज, सुट्टीच्या दिवशीसुद्धा, झोपण्याची आणि उठण्याची वेळ ठरवणं गरजेचं आहे. झोपण्याआधी मोबाईल, टीव्ही यांसारख्या स्क्रीनपासून दूर राहणं, खोलीत लाइट बंद करून राहणं, शांत वातावरण आणि थोडं थंड तापमान ठेवणं फायदेशीर ठरतं.