आजच्या काळात कंबरदुखी ही एक खूप सामान्य समस्या बनलीये. पूर्वी ही तक्रार वयोवृद्धांमध्ये आढळायची पण आता ती तरुणांपासून ते मुलांपर्यंत सगळ्यांमध्ये वाढताना दिसते. दिवसभर लॅपटॉपसमोर बसून काम करणं, मोबाईलवर बराचवेळ वाकून राहणं, शारीरिक हालचालींचा अभाव या सगळ्या सवयींमुळे आपल्या शरीरावर मोठा ताण येतो.

अनेकांना असं वाटतं की चुकीच्या पद्धतीने बसणं किंवा अयोग्य खुर्ची हीच कंबरदुखीची मुख्य कारणे आहेत. पण तज्ज्ञांच्या मते, चुकीचे पोस्चरच नाही तर मेंटल स्ट्रेस सुद्धा पाठीच्या आणि कंबरेच्या दुखण्यामागचं एक मोठं कारण ठरू शकतो.

आपलं मन आणि शरीर हे एकमेकांशी घट्टपणे जोडलेलं आहे. जेव्हा आपण ताण, टेन्शन किंवा नैराश्याच्या अवस्थेत असतो. तेव्हा हा मानसिक ताण शरीरावरही परिणाम करतो. शरीरातील वेदना, जडपणा किंवा जकडन हे मानसिक तणावाचेच कारण असू शकतं. सतत स्ट्रेसमध्ये राहिल्याने शरीरात कोर्टिसोल नावाचं हार्मोन जास्त प्रमाणात तयार होतं. या हार्मोनमुळे स्नायूंमध्ये जकडन, ताण आणि वेदना जाणवू लागतात. विशेषतः मानेच्या आणि कंबरेच्या भागात याचा परिणाम अधिक दिसून येतो.

मानसिक ताण वाढल्याने अनेकदा माणूस चुकीच्या पद्धतीने बसतो, झुकतो किंवा शरीर ढिलं ठेवतो, ज्यामुळे पाठीच्या कण्यावर दाब वाढतो. शिवाय, ताणाखाली असलेल्यांना झोप न लागणं किंवा झोप अपुरी राहणं ही देखील सामान्य गोष्ट असते. स्नायूंना पुरेसा आराम मिळत नाही आणि दुखणे वाढत जातं.

ताण आणि वेदनेच्या चक्रातून बाहेर पडण्यासाठी काही सोपे उपाय नियमित फॉलो करू शकता. नियमित व्यायाम करणं, योगासने करणं आणि दररोज १० ते १५ मिनिटं ध्यान करणं हे मानसिक ताण कमी करण्यास मदत करतं. विशेषतः भुजंगासन, बालासन आणि कॅट-काऊ पोज सारखी आसने पाठीच्या स्नायूंना बळकटी देतात.

काम करताना योग्य पोस्चरमध्ये बसणं, कंबरेला आधार देणारी खुर्ची वापरणं, पुरेशी झोप घेणं आणि प्रत्येक अर्ध्या तासाने थोडं चालणं किंवा स्ट्रेच करणं या सवयी अंगीकारल्यास मानसिक ताण आणि पाठीच्या वेदना दोन्हीपासून आराम मिळू शकतो.