बदलत्या जीवनशैलीमुळे सगळ्यांनाच बाहेरचे जंक फूड जास्त प्रमाणात आवडायला लागले आहेत. कोणतीही पार्टी असो वाढदिवस असो सगळ्यांनाच मेन्यूमध्ये चायनीज फूड हवे असतात. त्यामध्ये नुडल्सचा समावेश केला जातो. मात्र याचा तुमच्या जीवाला धोका आहे. असे संशोधनातून स्पष्ट करण्यात आले आहे. आठवड्यातून दोन ते तीन वेळा इन्स्टंट नूडल्स खाल्ल्याने हेल्थवर गंभीर परिणाम होतात. इन्स्टंट नूडल्समध्ये असलेले अतिसोडियम, संतृप्त फॅट्स आणि प्रक्रिया केलेले घटक हे हृदयरोग, स्ट्रोक आणि टाइप २ मधुमेहाचा धोका वाढवणारे प्रमुख कारण ठरतात.

एका सर्व्हिंगमध्येच दिवसाच्या शिफारस केलेल्या सोडियमपैकी मोठा भाग असतो. इतकं जास्त मीठ शरीरात गेल्याने थेट उच्च रक्तदाब वाढतो. उच्च रक्तदाब हा हृदयविकार आणि स्ट्रोकसाठी महत्त्वाचा धोका मानला जातो. त्यातच नूडल्समध्ये असलेले फॅट्स आणि प्रक्रिया केलेले घटक कोलेस्टेरॉलची पातळी वाढवतात आणि लठ्ठपणाला कारणीभूत ठरू शकतात. ही दोन्ही स्थिती मधुमेहाचा डायबेटीजचा धोका आणखी वाढवतात.

जास्त सोडियम, फॅट्स आणि प्रक्रिया केलेले घटक यांचे एकत्रित सेवन मेटाबॉलिक सिंड्रोमचा धोका वाढवते. या स्थितीत उच्च रक्तदाब, जास्त रक्तातील साखर, पोटाभोवती फॅट जमा होणे आणि असामान्य कोलेस्टेरॉल पातळी अशी अनेक लक्षणे दिसतात. ही सर्व लक्षणे पुढे जाऊन हृदयरोग, स्ट्रोक आणि डायबेटीजसारख्या गंभीर आजारांना कारणीभूत ठरतात.

याशिवाय, इन्स्टंट नूडल्समध्ये आवश्यक पोषक तत्त्वांची कमतरता असते. त्यामुळे त्यांचे नियमित सेवन केल्याने शरीराला आवश्यक पौष्टिकता मिळत नाही आणि एकूणच आरोग्य खालावण्याची शक्यता वाढते. तज्ज्ञांच्या मते, इन्स्टंट नूडल्सची सवय नियंत्रित करणे आणि त्यांच्या जागी पौष्टिक, घरगुती पर्यायांचा समावेश करणे जास्त सुरक्षित आणि आरोग्यदायी ठरते.