गेल्या काही काळापासून देशात हेपेटायटीसच्या रूग्णांचा आकडा अचानक वाढलेला दिसतोय. हा आजार इतका गंभीर असतो की याला अनेकदा 'सायलेंट लिव्हर किलर' असं म्हणतात. कारण अनेकदा ही समस्या लक्षात न येता वाढत असते. या समस्येमुळे तुमच्या लिव्हरला गंभीर इजा होते.

तज्ज्ञांच्या सांगण्यानुसार, या आजाराने ग्रस्त असलेल्या असलेल्या व्यक्तींना बरेच वर्ष कोणतीही लक्षणं दिसून येत नाहीत. यामुळे या समस्येचं निदान करणं कठीण असतं. वेळेत उपचार झाले नाही तर याचा विपरीत परिणाम लिव्हरवर होतो.

हेपेटायटिस म्हणजे काय?

सोप्या शब्दात सांगायचं झाल्यास हेपेटायटिस म्हणझे यकृताला येणारी सूज. ही परिस्थिती जीवघेणी ठरू शकते. हेपेटायटिसमुळे लिव्हरच्या वॉलला सूज येऊन त्याच्या कामात अडथळा येतो. हेपेटायटिस A, B, C मध्ये लिव्हरची सूज वाढून त्याची कार्यक्षमता कमी होते.

हेपेटायटिसची लक्षणं काय आहेत?

गेल्या काही काळात रुग्णसंख्या वाढल्यामुळे डॉक्टरांनी लोकांना सुरुवातीची लक्षणं ओळखण्याचं आवाहन केलंय.

सतत थकवा

पूर्ण झोप झाल्यानंतरही असामान्य थकवा जाणवणे हे लिव्हरला सूज येण्याचं सुरुवातीचं लक्षण असू शकतं.

अनपेक्षित वजन कमी होणं

आहार किंवा व्यायामात बदल न करता अचानक वजन कमी होत असेल तर सावध व्हा. हे लिव्हर नीट कार्य करत नसल्याचे संकेत असू शकतात.

भूक कमी होणं

हेपेटायटिसमुळे भूक कमी होते किंवा विशेषतः तेलकट पदार्थ खाण्याची इच्छा राहत नाही.

त्वचा किंवा डोळे पिवळे पडणं

लिव्हरचं कार्य बिघडल्यामुळे रक्तात Bilirubin वाढतं. यामुळे तुमची त्वचा आणि डोळे पिवळसर दिसू लागतात.

लघवीचा रंग गडद होणं

जर नेहमीपेक्षा तुमच्या लघवीचा रंग गडद होत असेल तर तुम्ही सावध राहिलं पाहिजे. याचा अर्थ तुमच्या लिव्हरवर ताण येत असल्याचं किंवा हेपेटायटिसचं लक्षणं आहे.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.