गणपती बाप्पाच्या आगमनाला सुरुवात झाली आहे. ठिकठिकाणी बाप्पा विराजमान होताना दिसत आहे. कालच मुंबईच्या लालबागच्या राजाचे आगमन झाले. गणपती बाप्पा घरी आल्यावर त्याच्या सेवेत घरातील सर्व मंडळी कामाला लागतात. नैवेद्य बनवणे, डेकोरेशन आणि प्रसाद अशी सर्व लगबग सुरू असते. गणपती बाप्पासह घरात प्रत्येक व्यक्तीला मोदक आवडतात.

गणपती बाप्पाला नेहमी 21 मोदकांचा नैवेद्य दिला जातो. आता बाप्पाला प्रसादामध्ये सर्वात जास्त मोदक का आवडतात. तसेच पहिल्या प्रसादाच्या ताटात 21 मोदकच का ठेवतात याची माहिती आज जाणून घेणार आहोत.

देवी देवतांच्या काळात वाईट शक्तीच्या राक्षसांनी आधी जन्म घेतला. या सर्व राक्षसांना संपवण्यासाठी देवता आवतरले. यामध्ये कंसाला मारण्यासाठी कृष्णाने जन्म घेतला. तर रावणाचा वध करण्यासाठी रामाने जन्म घेतला होता. त्याचप्रमाणे वाईट वृत्तीच्या देवांतक आणि नारांतक या दोघांना संपवण्यासाठी बाप्पाने विनायक या नावाने जन्म घेतला, असे शास्त्रात सांगण्यात आले आहे.

देवांतक आणि नारांतकला संपवण्यासाठी युद्ध

देवांतक आणि नारांतकचा वध करण्यासाठी मोठं युद्ध पेटलं. युद्ध म्हटलं म्हणजे सैनिक हवेच. तर गणपती बाप्पा म्हणजे विनायकाने 20 सैनिक घेतले होते.

20 सैनिकच का घेतले?

विनायकांनी 20 सैनिकच का घेतले याचं कारण जाणून घेऊ. त्याकाळी हाताची 10 आणि पायाची 10 अशी 20 आकड्यांची आकडेमोड व्यायची. म्हणजे व्यवहारात 20 गणात पकडला जायचा. त्यामुळे विनायक यांनी 20 सैनिक घेतले होते.

20 सैनिकांचा एक गण आणि या सैनिकांचे नेतृत्व करणारा गणपती बाप्पा अशी याची कथा आहे. त्यामुळे एकूण झाले 21. प्रत्येकाला एक एक प्रसाद मिळावा यासाठी बाप्पासमोर नेहमी 21 मोदकांचा नैवेद्य ठेवला जातो. यामध्ये 21 मोदक, 21 लाडू, 21 पेढे, असे सर्व पदार्थ 21 ठेवण्याची प्रथा सुरू झाली.