चुकीच्या जीवनशैलीमुळे सध्या ब्रेन ट्यूमरच्या प्रकरणांमध्ये स्पष्ट वाढ होताना दिसतेय. बदलती जीवनशैली, वाढता ताण, प्रदूषण आणि इलेक्ट्रॉनिक उपकरणांचा जास्त वापर ही त्याची संभाव्य कारणं मानली जातायत. कधीकधी त्याची लक्षणं इतकी सामान्य असतात की, लोक त्याकडे दुर्लक्ष करतात.

मात्र तज्ज्ञांच्या सांगण्यानुसार, ब्रेन ट्यूमर ही एक गंभीर परिस्थिती असून सुरुवातीच्या स्टेजमध्ये याची काही लक्षणं दिसून येतात. जेव्हा मेंदूच्या पेशी अनियंत्रितपणे वाढू लागतात, ज्यामुळे मेंदूच्या कार्यावर परिणाम होतो. ब्रेन ट्यूमरची लक्षणे हळूहळू विकसित होऊ शकतात आणि अनेकदा दुर्लक्षित केली जातात. ही लक्षणं कोणती आहेत ते पाहूयात.

सतत डोकेदुखी

ब्रेन ट्यूमरचे सर्वात सामान्य लक्षण म्हणजे डोकेदुखी. पण ही डोकेदुखी सामान्य नसते. यामध्ये डोकेदुखी सकाळी तीव्र असते आणि कालांतराने वाढू लागते. जर तुम्हालाही अशा वेदना होत असतील आणि औषध घेतल्यानंतरही डोकेदुखी कमी होत नसेल, तर हे एक लक्षण असू शकतं.

दृष्टीसंबंधी समस्या

जर तुमची दृष्टी अचानक अंधुक झाली किंवा तुम्हाला धुसरं दिसू लागलं तर हा ब्रेन ट्यूमरच्या दाबाचा परिणाम असू शकतो. मेंदूच्या ज्या भागात ट्यूमर तयार होतो त्या भागातील नसांवर दाब पडल्याने डोळ्यांवर परिणाम होऊ शकतो.

बोलण्यात किंवा ऐकण्यात समस्या

जर कोणा व्यक्तीला बोलण्यामध्ये समस्या जाणवत असतील किंवा समोरची व्यक्ती काय म्हणतेय हे समजत नसेल तर हे मेंदूतील समस्येचं लक्षण असू शकतं. हे ब्रेन ट्यूमर, स्ट्रोक किंवा कोणत्याही न्यूरोलॉजिकल समस्येचं लक्षणं मानलं जातं.

मसल्स कमकुवत होणं

ब्रेन ट्यूमरमुळे शरीराच्या हालचालींवरही परिणाम होऊ शकतो. जर तुम्हाला अचानक तुमच्या हातपायांमध्ये अशक्तपणा जाणवत असेल किंवा चालताना तोल जात असेल तर हे मेंदूच्या गंभीर समस्येचं लक्षण असू शकतं. तज्ज्ञांच्या म्हणण्यानुसार हे ब्रेन ट्यूमरचं लक्षण असू शकतं.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत