डोळ्यांना धुरकट दिसत असेल तर ही समस्या हलक्यात घेऊ नका. ही समस्या असू शकते एका गंभीर आजाराची लक्षणं, धुरकट दिसायला लागलं की आपल्याला बहुतेकवेळा वाटतं आपल्याला चष्मा लागला आहे. त्यामुळे आपण चष्म्याच्या मागे धावतो किंवा जाणीवपूर्वक दुर्लक्ष करतो. पण या समस्येकडे दुर्लक्ष केल्याने ब्रेन ट्युमर सारख्या एका मोठ्या आजाराला तोंड द्यावे लागू शकते.
डॉक्टरांच्या मते, आपले डोळे हे प्रत्यक्षात मेंदूचाच एक भाग मानले जातात. आपण एखादी गोष्ट पाहतो तेव्हा तिची माहिती डोळ्यांमधून ऑप्टिक नर्व्हद्वारे मेंदूपर्यंत पोहोचते. त्यानंतर ही माहिती मेंदूतील विविध भागांमधून जात शेवटी त्या भागापर्यंत पोहोचते जो आपण पाहिलेल्या गोष्टी ओळखण्याचं आणि समजून घेण्याचं काम करतो.
या संपूर्ण मार्गात कुठेही ट्यूमर तयार झाला, मेंदूवर दबाव वाढला किंवा मज्जातंतूमध्ये काही बिघाड झाला तर त्याचे पहिले संकेत अनेकदा डोळ्यांमध्ये दिसणाऱ्या बदलांमधून मिळू शकतात. त्यामुळेच डॉक्टर वारंवार सांगतात की, डोळे आणि मेंदू यांचा एकमेकांशी अतिशय जवळचा संबंध आहे.
काही विशिष्ट प्रकारचे ब्रेन ट्यूमर सुरुवातीला डोळ्यांशी संबंधित समस्यांमुळेच लक्षात येतात. त्यापैकी पिट्यूटरी अॅडेनोमा हा एक प्रकार आहे. हा बहुतेक वेळा कॅन्सर नसलेला ट्यूमर असून तो पिट्यूटरी ग्रंथीजवळ तयार होतो. हा ट्यूमर हळूहळू दृष्टी कमी करू लागतो. सुरुवातीला याची ठळक लक्षणे दिसत नसल्यामुळे तो अनेकदा शांतपणे वाढत राहतो.
दुसरा प्रकार म्हणजे क्रेनिओफॅरिंजिओमा. हा ट्यूमर लहान मुलांमध्ये तसंच प्रौढांमध्येही होऊ शकतो. तोही पिट्यूटरी ग्रंथीजवळ तयार होतो. यामुळे डोळ्यांशी संबंधित समस्या निर्माण होऊ शकतात. तसंच शरीरातील हार्मोन्सच्या कार्यातही बिघाड होण्याची शक्यता असते.
तिसरा प्रकार म्हणजे मेनिन्जिओमा. हा ट्यूमर जर डोळ्यापासून मेंदूपर्यंत जाणाऱ्या ऑप्टिक नर्व्हजवळ किंवा पिट्यूटरी ग्रंथीच्या आसपास वाढला तर तो दृष्टीच्या मार्गावर दबाव आणू शकतो. त्यामुळे दृष्टी धूसर होणं किंवा बाजूचं दिसणं कमी होणं अशा समस्या निर्माण होऊ शकतात.
चौथा प्रकार म्हणजे ऑप्टिक पाथवे ग्लायोमा. हा ट्यूमर डोळ्यांकडून मेंदूकडे संदेश पोहोचवणाऱ्या मार्गावर थेट परिणाम करतो. त्यामुळे कालांतराने हळूहळू दृष्टी कमी होत जाते.
टीप : ही माहिती सर्वसाधारण माहितीसाठी आहे. कोणताही वैद्यकीय सल्ला घेण्यापूर्वी आपल्या डॉक्टरांचा सल्ला घेणे आवश्यक आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.