अजित पवारांच्या राष्ट्रवादीमुळे विधानसभेसाठीच्या भाजपच्या इच्छुकांची कोंडी झाल्याचं चित्र आहे. अद्याप जागावाटप झालेलं नाही मात्र महायुतीत विद्यमान आमदारांच्या जागा त्या-त्या पक्षांना जातील, असं सूत्र जवळपास निश्चित झाल्याचं बोललं जातंय. अनेक मतदारसंघांमध्ये अजित पवारांच्या राष्ट्रवादीचे विद्यमान आमदार आहेत.

मात्र याच ठिकाणी भाजपच्या अनेक इच्छुकांनी तयारी केल्याची माहिती आहे. तर तिकीटासाठी गेलेले सत्ता आल्यानंतर परत येतील, असा दावा मंत्री सुधीर मुनगंटीवारांनी केलाय.

कागल -

समरजितसिंह घाटगे यांनी नुकताच भाजपला रामराम ठोकत शरद पवार यांच्या पक्षात प्रवेश केला. हसन मुश्रीफ हे सध्या कागलचे आमदार आहेत. महायुतीमध्ये ही जागा भाजपला सुटण्याची शक्यता कमीच असल्यामुळे घाटगे यांनी तुतारी फुंकण्याचा निर्णय घेतला. पण महायुतीमध्ये विधानसभा लढवण्यासाठी असे अनेकजण इच्छूक आहेत. विद्यमान आमदारांना डावलून त्यांना संधी मिळणार का? की ते नेते वेगळी वाट धरणार? याची चर्चा सुरु आहे.

इंदापूर -

हर्षवर्धन पाटील तुतारी फुंकणार असल्याच्या गेल्या काही दिवसांपूर्वी सुरु झाल्या होत्या. कारण, इंदापूर मतदारसंघातून ते विधानसभेसाठी इच्छूक आहेत. पण या ठिकाणी अजित पवार गटाचे विद्यमान आमदार आहेत. दत्तात्रय भरणे यांना महायुतीकडून तिकिट मिळणार का? जर तिकिट नाही मिळाले तर हर्षवर्धन पाटील वेगळी वाट धरणार का? याची चर्चा इंदापूरमध्ये सुरु आहे.

वडगाव शेरी -

अजित पवार यांनी शरद पवार यांच्यापासून फारकत घेतल्यानंतर सुनील टिंगरे यांनी त्यांच्यासोबत जाण्याचा निर्णय घेतला. पण आता त्यांना तिकिट मिळेल का? असा सवाल उपस्थित झाला आहे. कारण वडगाव शेरी मतदारसंघामधून भाजपचे जगदीश मुळीक इच्छूक आहेत. आता या मतदारसंघात कुणाला तिकिट मिळणार, हे लवकरच समजेल.

अंमळनेर -

अमंळनेर विधानसभा मतदारसंघात महायुतीमध्ये जागावटपावरून तेढ निर्माण झालाय. येथे अजित पवार यांच्या राष्ट्रवादीचे आमदार आहेत. पण या मतदारसंघात भाजपकडून शिरीष चौधरी इच्छूक आहेत. त्यामुळे अनिल पाटील यांना पुन्हा संधी मिळणार का? याची मतदारसंघात चर्चा सुरु आहे.

कोपरागव -

कोपरगाव विधानसभा मतदारसंघाचे विद्यमान आमदार आशुतोष काळे आहेत. पण यावेळी त्यांना भाजपकडून आव्हान मिळत आहे. विवेक कल्हे या मतदारसंघातून इच्छूक आहेत. आता महायुतीमध्ये कुणाला संधी मिळणार, याकडे लक्ष लागलेय.