आजचे पंचांग

सोमवार,७ एप्रिल २०२५,चैत्र शुक्लपक्ष.

तिथी- दशमी २०|०१

रास-कर्क

नक्षत्र-आश्लेषा (अहोरात्र)

योग- धृति

करण-तैतिल

दिनविशेष-उत्तम दिवस

मेष - गाड्यांची विशेष आवड आपल्याला आहे. आजच्या या दिवशी आपल्याला नवीन वाहन खरेदी किंवा चांगल्या वाहनांमधून फिरण्याचे योग येतील. "सुख आले दारी" अशी भावना राहील. दिवस चांगला आहे.

वृषभ - बहिणीची विशेष माया आणि प्रेम आज लाभेल. भाग्याला पराक्रमाची जोड असेल तर यश आपलेच असते हे जाणवेल. कलंदर वृत्तीने आयुष्य जगण्याचा संकल्प आज कराल.

मिथुन - "इथून तिथून मिथुन" असा दिवस आहे. आपल्याला एक वेगळ्या कामात वर्चस्व मिळेल. कुटुंबीयांच्या मध्ये खेळीमेळीचे वातावरण ठेवण्यात आज आपण दुवा असाल.दिवस चांगला आहे.

कर्क - "आनंदाचे डोही आनंद तरंग" असा काहीसा दिवस आहे. तसंही आपली साधी आणि सात्विक असणारे रास छोट्या गोष्टीत आनंद मिळणारी आहे. आज स्वतःमध्ये आनंद शोधाल आणि स्वस्थ रहाल.

सिंह - "ये रे माझ्या मागल्या" अशी अवस्था राहील. विनाकारण त्रास कटकटी वाढतील. पुन्हा पुन्हा त्याच गोष्टी कराव्या लागतील. मनस्थिती सांभाळून पुढे जावं लागेल. खर्चाला मात्र धरबंद राहणार नाही.

कन्या - मैत्रीचा दुवा हा सर्व गोष्टीचा त्रास विसरणारा असतो. सहजगत्या इतरांना आपलेसे करावे. नव्याने परिचय होतील. मैत्री वृद्धिंगत होईल. एकत्रित रित्या स्नेहभोजनाचे योग आहे.

तूळ - पैशासाठी सर्व काही हे आपल्याला माहिती आहेच. धावपळ असेल, तरीसुद्धा दिवस सार्थकी लागेल. आपल्यालाआपल्या कामाचे वेगळेपण सिद्ध करून दाखवायला आवडते आणि ते आज नक्की कराल.

वृश्चिक - कुलस्वामिनीची उपासना करावी. आयुष्याला कलाटणी देणाऱ्या घटना घडतील. नातवंड सौख्य चांगले. सृजनशीलता वाढेल. उपासनेवर दृढविश्वास होईल. सद्गुरु भेटतील. दिवस चांगला आहे.

धनु - "तळ्यात मळ्यात" असा काहीसा दिवस राहिल. ठरवलेल्या गोष्टी तशाच घडतील असं वाटत नाही. पण कोणाचेही मदतीची अपेक्षा न करता पुढे जावे लागेल. कामाचा व्याप वाढता राहील.

मकर - अनेक दिवस केलेल्या गोष्टींचे नियोजन आज सफल होईल. आपल्या कामाचा आराखडा पक्का आणि साचेबद्ध असतो. व्यवसायात भागीदाराबरोबर हातात हात घालून काम कराल. यशस्वी दिवस आहे.

कुंभ - तब्येतीच्या तक्रारी मागे लागतील. जुन्या काही गोष्टी, जुने आजार पुन्हा डोके वर काढतील. आपले महत्त्वाचे ऐवज आणि जिन्नस यांच्यावर विशेष नजर ठेवा. दिवस बरा आहे.

मीन - दत्त उपासना आज फलदायी ठरेल. नवीन गोष्टी कामामध्ये सुचतील. विद्या, कला, क्रीडा, संततीसौख्य, धन या दृष्टीने दिवस खूप छान जाईल. एक वेगळी उर्मी आणि चैतन्य जाणवेल.