Kamali Marathi Serial: मराठी टेलिव्हिजनवरील लोकप्रिय ‘कमळी’ या मालिकेत सध्या प्रेक्षकांना धक्का देणारा मोठा ट्विस्ट पाहायला मिळत आहे. मालिकेतील कमळी आणि कामिनी यांच्यातील वाद आधीपासूनच प्रेक्षकांना पाहायला मिळत होता. मात्र आता कथानकाने असा वळण घेतलं आहे की, प्रेक्षकही थक्क झाले आहेत.

मालिकेत कमळी महाजन कुटुंबात आल्यानंतर कामिनी तिच्याविरोधात सतत कट-कारस्थान रचताना दिसते. कामिनी आपल्या मुलगी रागिणी आणि नात अनिकाला हाताशी घेऊन कमळीला अडचणीत आणण्याचा प्रयत्न करत असते. तिचं एकच ध्येय असतं घरातील सर्व संपत्ती आपल्या लाडक्या नात अनिकाच्या नावावर व्हावी. त्यामुळे अनिकाही आजीच्या प्रत्येक गोष्टीला पाठिंबा देताना दिसते.

दरम्यान, रंगपंचमीच्या प्रसंगात कमळीला जबरदस्तीने थंडाई पाजण्यामागे कामिनी आणि अनिकाच असल्याचा खुलासा होतो. हा प्रकार उघड झाल्यानंतर कथानकात आणखी मोठा ट्विस्ट येतो. एका प्रसंगात कामिनीला उंचावरून खाली ढकलून तिच्या जीवावर बेतल्याचं दाखवलं जातं. या घटनेनंतर रागिणी पोलिसांसमोर कमळीवर आरोप करते की, कमळीनेच कामिनीला मारण्याचा प्रयत्न केला. त्यामुळे पोलिस कमळीला चौकशीसाठी घेऊन जातात.

मात्र नंतर धक्कादायक सत्य समोर येतं. कामिनीला ढकलणारी व्यक्ती दुसरी कोणी नसून तिचीच लाडकी नात अनिका असल्याचं उघड होतं. इतकंच नाही तर रुग्णालयात असताना अनिका स्वतःच आजीला सांगते की तिनेच तिला ढकललं. ती इतकी निर्दयी बनते की हॉस्पिटलमध्येही कामिनीचा ऑक्सिजन मास्क काढण्याचा प्रयत्न करते, ज्यामुळे तिच्या आजीला श्वास घेण्यास त्रास होतो.

या अनपेक्षित वळणामुळे प्रेक्षकांमध्ये पुढे काय होणार याची चर्चा रंगली आहे. अनेकांनी सोशल मीडियावर आश्चर्य व्यक्त करत हा ट्विस्ट पूर्णपणे अनपेक्षित असल्याचं म्हटलं आहे. ‘कमळी’ मालिकेचा हा विशेष भाग १७ मार्च रात्री ९ वाजता पाहायला मिळणार आहे.