Famous Youtuber Death: उत्तर प्रदेशातील हाथरस जिल्ह्यातील रहिवासी आणि लोकप्रिय युट्यूबर छवी वार्ष्णेयचा मध्य प्रदेशातील रस्ते अपघातात दुर्दैवी मृत्यू झाला. २३ वर्षीय छवीचे यूट्यूबवर ७ लाखांहून अधिक सबस्क्राइबर्स होते. या अपघातात तिच्या ५० वर्षीय आई सारिका यांचाही मृत्यू झाला. मंगळवारी हा भीषण अपघात घडला असून, या घटनेमुळे हाथरस परिसरात शोककळा पसरली आहे.

मिळालेल्या माहितीनुसार, छवी वार्ष्णेय सोमवारी रात्री उशिरा आपल्या कुटुंबीयांसह उज्जैन येथील महाकाल मंदिरात दर्शनासाठी निघाली होती. तिच्यासोबत वडील श्यामलाल, आई सारिका, नातेवाईक सूरजपाल आणि कार चालक सचिन होते. उज्जैन-गरोठ या चारपदरी महामार्गावर रामखेडी गावाजवळ त्यांच्या कारची पुढे चालणाऱ्या ट्रकला जोरदार धडक झाली.

धडक इतकी भीषण होती की कारचा अक्षरशः चक्काचूर झाला. या अपघातात छवी आणि तिच्या आईचा घटनास्थळीच मृत्यू झाला. अपघाताची माहिती मिळताच बारोड पोलिसांनी घटनास्थळी धाव घेतली. दोघींचे मृतदेह एनएचएआयच्या रुग्णवाहिकेतून बारोड येथील शासकीय रुग्णालयात नेण्यात आले. पोलिसांनी मृतदेह ताब्यात घेऊन शवविच्छेदनासाठी पाठवले आहेत.

या दुर्घटनेत छवी यांचे वडील श्यामलाल, नातेवाईक सूरजपाल आणि चालक सचिन हे गंभीर जखमी झाले आहेत. बारोड येथील सामुदायिक आरोग्य केंद्रात डॉ. विजेंद्र चुडिहार यांनी जखमींवर प्राथमिक उपचार केले. प्रकृती गंभीर असल्याने त्यांना पुढील उपचारासाठी आगर येथील जिल्हा रुग्णालयात हलवण्यात आले आहे. अपघात नेमका कशामुळे झाला, याचा तपास बारोड पोलीस करत आहेत.

२०२१ मध्ये सुरू केले होते यूट्यूब चॅनेल

छवीने २०२१ मध्ये स्वतःचे यूट्यूब चॅनेल सुरू केले होते. त्या दैनंदिन जीवनातील प्रसंगांवर आधारित व्लॉग्स तसेच ऑनलाइन गेमिंगचे व्हिडिओ पोस्ट करत होत्या. तिच्या कंटेंटला प्रेक्षकांचा चांगला प्रतिसाद मिळाला आणि काही वर्षांतच त्यांनी यूट्यूबवर ७ लाखांहून अधिक सबस्क्राइबर्सचा टप्पा गाठला. याशिवाय इंस्टाग्रामवरही त्यांचे १ लाखांहून अधिक फॉलोअर्स होते. छवीच्या निधनाची बातमी समोर आल्यानंतर तिच्या चाहत्यांकडून सोशल मीडियावर श्रद्धांजली अर्पण करण्यात येत आहे. छवी आणि त्यांच्या आईचे पार्थिव आज हाथरस येथील महाउखास गावात आणले जाणार आहे.