मुंबई : सुप्रसिद्ध ज्येष्ठ गायक भूपिंदर सिंह यांचं आज निधन झालं आहे. भूपिंदर सिंह हे ८२ वर्षांचे होते. आज त्यांनी मुंबईत अखेरचा श्वास घेतला. भूंपिदर सिंह यांच्या जाण्याने संगीत क्षेत्रावर शोककळा पसरली आहे. (Veteran Playback singer Bhupinder Singh passes away)

भूंपिंदर सिंह यांच्या पत्नी मिताली सिंह यांनी एका मुलाखतीमध्ये सांगितले की, 'भूंपिंदर सिंह हे अनेक दिवसांपासून आजारी होते. अनेक आजारांशी त्यांची झुंज सुरू होती.' भूपिंदर सिंह यांच्या मृत्यूमुळे हिंदी सिनेसृष्टीत शोककळा पसरली आहे.

भूपिंदर सिंह यांनी हिंदी सिनेसृष्टीत आपल्या आवाजाची छाप निर्माण केली. तसेच त्यांनी मोहम्मद रफी, तलत महमूद आणि मन्ना डे यांच्यासोबत अनेक गाणी गायली आहेत. 'मेरा रंग दे बसंती चोला', 'प्यार हमें किस मोड पे ले आया', 'हुजूर इस कदर', 'एक अकेला इस शहर मे', 'जिंदगी मिलके बिताएंगे', 'बीती ना बितायी रैना', 'नाम गुम जाएगा' ही त्यांची गाणी तुफान गाजली.

मुख्यमंत्री एकनाथ शिंदे यांची ज्येष्ठ गायक भूपिंदर सिंह यांना श्रद्धांजली

'आपल्या भावस्पर्शी आवाजाने रसिकांच्या मनावर अधिराज्य गाजवणारा कलावंत हरपला आहे,' अशा शब्दांत मुख्यमंत्री एकनाथ (Eknath Shinde) शिंदे यांनी ज्येष्ठ गायक भूपिंदर सिंह यांच्या निधनाबद्दल श्रद्धांजली वाहिली आहे.

'मनाचा ठाव घेणाऱ्या आपल्या आवाजाने भूपिंदर सिंह यांनी अनेक गझल अजरामर केल्या. त्यांचा धीरगंभीर आणि भावस्पर्शी आवाज रसिकांच्या मनात कायम स्वरुपी रुंजी घालत राहील. ज्येष्ठ गायक, गझलकार भुपिंदर सिंह यांना भावपूर्ण श्रद्धांजली, असे मुख्यमंत्र्यांनी शोकसंदेशात म्हटले आहे.