Summary -

• मल्याळम अभिनेते आणि निर्माते कन्नन पट्टाम्बी यांचे निधन

• ६२ व्या वर्षी घेतला अखेरचा श्वास

• मूत्रपिंडाच्या आजारामुळे गेल्या अनेक वर्षांपासून होते त्रस्त

• २३ मल्याळम चित्रपटांमध्ये त्यांनी काम केले होते

दाक्षिणात्य चित्रपटसृष्टीतून एक दु:खद बातमी समोर आली आहे. प्रसिद्ध मल्याळम चित्रपट निर्माते आणि अभिनेते कन्नन पट्टाम्बी यांचे निधन झाले. रविवारी रात्री उशिरा राहत्या घरी त्यांनी अखेरचा श्वास घेतला. ते ६२ वर्षांचे होते. त्यांच्या निधनामुळे दाक्षिणात्य चित्रपटसृष्टीवर शोककळा पसरली. त्यांचे चाहते आणि कलाकार सोशल मीडियावर पोस्ट करत श्रद्धांजली वाहत आहेत.

कन्नन पट्टाम्बी यांचे रविवारी रात्री उशिरा निधन झाले. रात्री पावणे बारा वाजताच्या सुमारास पलक्कड येथील न्यांगथिरी या राहत्या घरी त्यांनी अखेरचा श्वास घेतला. कन्नन पट्टाम्बी यांचे मोठे भाऊ अभिनेते- दिग्दर्शक मेजर रवी यांनी फेसबुकवर पोस्ट करत त्यांच्या निधनाच्या वृत्ताची माहिती दिली. गेल्या ३ दशकापेक्षा अधिक काळ त्यांनी चित्रपटसृष्टीत काम केले होते. ते जरी पडद्यामागे काम करत असले तरी देखील त्यांनी अनेक लक्षात राहणाऱ्या भूमिका साकारल्या होत्या.

सोमवारी दुपारी ४ वाजता पट्टांबी येथील न्यांगथिरी येथील निवासस्थानी त्यांचे पार्थिव अंत्यदर्शनासाठी ठेवले जाईल. त्यानंतर अंत्यसंस्कार केले जातील. कन्नन पट्टाम्बी हे चित्रपटसृष्टीतील त्यांच्या उल्लेखनीय योगदानासाठी ओळखले जात होते. त्यांनी अभिनेता म्हणून आणि निर्माता म्हणून चांगले काम केले होते. जरी ते अनेकदा प्रसिद्धीपासून दूर राहिले असले तरी त्यांच्या कामाने अनेक मोठे प्रोजेक्ट सुरळीतपणे पूर्ण झाले. हे प्रोजेक्ट पूर्ण करण्यात त्यांनी महत्त्वाची भूमिका बजावली. कन्नन पट्टाम्बी यांनी एक अभिनेता म्हणून २३ मल्याळम चित्रपटांमध्ये काम केले. त्यापैकी बरेच चित्रपट हिट ठरले. त्यांनी मोहनलालसोबत देखील काम केले.

मिळालेल्या माहितीनुसार, कन्नन पट्टाम्बी यांचे निधन मूत्रपिंडाशी संबंधित आजाराने झाले. ते गेल्या अनेक वर्षांपासून या आजारामुळे त्रस्त होते. त्यांच्या अभिनय कारकिर्दीतील सर्वात मोठी कामगिरी म्हणजे 'पुलिमरुगन' हा ब्लॉकबस्टर चित्रपट मल्याळम चित्रपटसृष्टीत एक महत्त्वाचा टप्पा ठरला. त्यांनी 'ओडियान' आणि '१२ वा मॅन' सारख्या लोकप्रिय चित्रपटात काम केले होते. पट्टाम्बी यांनी 'अनंतभद्रम', 'वेत्तम' आणि 'कीर्तिचक्र' यासारख्या उल्लेखनीय चित्रपटांमध्ये देखील काम केले आहे.