प्रसिद्ध चित्रपट दिग्दर्शक सुभाष घई रुग्णालयात दाखल करण्यात आले आहे. सुभाष घई यांना मुंबईतील लीलावती रुग्णालयात दाखल करण्यात आले आहे. कुटुंबीयांकडून मिळालेल्या माहितीनुसार, सुभाष घई यांना वार्षिक तपासणीसाठी रुग्णालयात दाखल करण्यात आले आहे. श्वसनाची समस्या तसेच अशक्तपणामुळे सुभाष घई यांना रुग्णालयात भरती करण्यात आल्याचं सांगितलं जात आहे.

सुभाष घई यांचा जन्म 24 जानेवारी 1945 रोजी नागपूर, महाराष्ट्र येथे झाला. ताल, परदेस, राम-लखन, खलनायक आणि मेरी जंग सारखे सदाबहार चित्रपट सुभाष घई यांनी बनवले आहेत. ते हिंदी चित्रपटसृष्टीतील प्रसिद्ध चित्रपट निर्माते आहेत. सुभाष घई यांच्या चित्रपटातील गाणी आणि सीन्स आजही लोकांच्या आठवणीत आहेत. सुभाष घई यांना लहानपणापासूनच अभिनेता व्हायचे होते, पण नशिबाने त्यांना यशस्वी दिग्दर्शक केलं.

राज कपूर यांच्यानंतर त्यांना इंडस्ट्रीतील दुसरे 'शो मॅन' म्हटले जाते. सुभाष घई यांनी त्यांच्या यशस्वी चित्रपट कारकिर्दीत सुमारे 16 चित्रपटांचे दिग्दर्शन केले आहे, त्यापैकी 13 बॉक्स ऑफिसवर हिट ठरलेत. 2006 मध्ये 'इकबाल' चित्रपटासाठी त्यांना राष्ट्रीय पुरस्कारानेही सन्मानित करण्यात आले होते. सुभाष घई यांनी केवळ मोठे आणि ब्लॉक बस्टर चित्रपट बनवले नाहीत, तर अनेक दिग्गज कलाकारांना त्यांनी आपल्या चित्रपटातून लॉन्च केले आहे.

सुभाष घई यांनी त्यांच्या चित्रपटांमधून जॅकी श्रॉफ, रीना रॉय, मीनाक्षी, माधुरी दीक्षित, मनीषा कोईराला आणि महिमा चौधरी या कलाकारांना ब्रेक दिलाय. घई हे व्हिसलिंग वुड्स नावाची एक अभिनय संस्था चालवत आहेत. ही शाळा जगातील शीर्ष 10 चित्रपट शाळांपैकी एक मानली जाते.