Jabbar Patel: कोल्हापुरात लोकराजा राजर्षी शाहू महाराज यांच्या १५० व्या जयंतीनिमित्त आयोजित भव्य कार्यक्रमात यंदाचा ३९ वा 'शाहू पुरस्कार' ज्येष्ठ दिग्दर्शक डॉ. जब्बार पटेल यांना प्रदान करण्यात आला. खासदार शाहू छत्रपती महाराज यांच्या हस्ते हा पुरस्कार शाहू स्मारकात दिला गेला. या पुरस्कारात एक लाख रुपये रोख रक्कम, मानपत्र, शाल आणि श्रीफळ देण्यात आले.

डॉ. जब्बार पटेल यांनी पुरस्कार स्वीकारताना मिळालेली एक लाख रुपयांची रक्कम त्यांनी बाबा आमटे यांच्या आनंदवनासाठी आणि अंधश्रद्धा निर्मूलन समितीसाठी विभागून दिली. त्यांनी आपल्या भाषणात शाहू महाराजांचे सामाजिक कार्य आणि मूल्ये यांना उजाळा दिला.

डॉ. जब्बार पटेल म्हणाले, 'माझ्या आयुष्यात अनेक पुरस्कार मिळाले, पण शाहू महाराजांच्या नावाने मिळणारा हा पुरस्कार अत्यंत वेगळा आणि सन्मानाचा आहे. शाहू महाराज हे लोकशाही नसताना लोकशाहीच्या मूल्यांची जपणूक करणारे राजा होते. त्यांनी सर्वसामान्यांशी नातं जोडलं आणि पहिल्यांदा आरक्षण लागू केलं. आजही कोल्हापूर चित्रपटांचं विद्यापीठ आहे, इथं माझ्या पहिल्या सिनेमाची सुरुवात झाली. या शहराशी माझं विशेष नातं आहे.'

प्रकाश आबिटकर यांनी कार्यक्रमात जाहीर केलं की, राजर्षी शाहू छत्रपती मेमोरियल ट्रस्टसाठी जिल्हा नियोजन मंडळाच्या माध्यमातून ५ कोटी रुपयांचा निधी दिला जाईल. या कार्यक्रमात अनेक मान्यवर, शाहू विचारांचे अनुयायी, आणि कलाविश्वातील प्रतिनिधी मोठ्या संख्येने उपस्थित होते. कोल्हापुरात शाहू महाराजांचा सामाजिक वारसा आणि त्यांच्या विचारांचा जागर पुन्हा एकदा या सोहळ्यातून दिसून आला.