'वीण दोघांतली ही तुटेना' मालिकेत सध्या अंशुमनचे लग्न पाहायला मिळत आहे. मात्र स्वानंदीला समजते की, चिंगी गरोदर आहे आणि तिच्या पोटातील बाळ अंशुमनचे आहे. स्वानंदी आणि चिंगी मिळून अंशुमनचे लग्न थांबवताना दिसतात. त्यानंतर स्वानंदी घडलेला सर्व प्रकार समर आणि राजवाडेंच्या संपूर्ण कुटुंबाला सांगते. अंशुमनचे प्रताप ऐकून घरातील सर्वच सदस्य अंशुमनवर धडकतात. समरचा पारा देखील चढतो मात्र अंशुमन स्वतःची चुक कबूल करण्यापेक्षा चिंगीवरच घाणेरडे आरोप करतो. 'वीण दोघांतली ही तुटेना' चा नवीन प्रोमो व्हिडीओ समोर आला आहे.

प्रोमो व्हिडीओत नेमकं काय?

अंशुमन म्हणतो की, "ही एवढी चाप्टर आहे ना, हिला माहीत आहे, हिचे हे सर्व प्रकार माझ्यापाशी खपवून घेतले जाणार नाही... म्हणून या थराला गेली आहे ही मोलकरीण... " असे बोलून अंशुमन चिंगीला चप्पलेने थोबाडीत मारायला जातो, मात्र स्वानंदी त्याला थांबवते आणि म्हणते की, "चिंगीवर नाही, तर कुठल्याच बाईवर हात उगारायचा नाही हा परत..." त्यानंतर पुन्हा अंशुमन म्हणतो की, "मला काय वेड लागलंय का? घरातील मोलकरीणीसोबत असे चाळे करायला... आमच्यासारख्या मोठ्या फॅमिलीसोबत असे स्कॅम होतच असतात... उद्या येऊन कोणी बोलले की समर राजवाडेंमुळे त्या प्रेग्नेंट आहेत, तर काय कराल?" असा प्रश्न अंशुमन स्वानंदीला करतो. आता स्वानंदी अंशुमनला कसा धडा शिकवणार आणि त्याच्याकडून सत्य कस काढून घेणार हे पाहणे महत्त्वाचे ठरणार आहे.

झी मराठीने शेअर केलेल्या या प्रोमो व्हिडीओला "अंशुमनच्या आरोपाला काय असेल स्वानंदीचं प्रत्युत्तर?" असं कॅप्शन देण्यात आले आहे. चाहते, प्रेक्षक व्हिडीओवर भरभरून कमेंट्सचा पाऊस पाडत आहे. 'वीण दोघांतली ही तुटेना' मालिका सध्या महत्त्वाच्या वळणावर आली आहे. भावाचे असे रूप पाहून आता समर काय करते हे पाहणे देखील मनोरंजक ठरणार आहे. मालिकेत फुल व्होल्टेज ड्रामा पाहायला मिळत आहे. 'वीण दोघांतली ही तुटेना' ही मालिका सायंकाळी ७:१५ वाजता झी मराठी वाहिनीवर पाहायला मिळते.

समर घेतो मोठा निर्णय

अंशुमनचा प्रताप ऐकल्यावर समर मोठा निर्णय घेतो. समर अंशुमनला DNA टेस्ट करायला सांगतो. समर अंशुमनला म्हणतो की, "तुला मी शेवटची संधी देतोय अंशुमन, आता तू माझ्याशी खरं बोललास ना...तर निदान मी तुझ्याशी माणूस म्हणून नीट वागेन. पण, जर तू ही जबाबदारी नाकारलीस आणि DNA टेस्टमध्ये हे मुल तुझेच असल्याचे समजले तर विषय संपला... या घराचे दरवाजे तुझ्यासाठी कायमचे बंद... यापुढे तुझे कोणाशीही कुठलेच नाते नसेल... "