Ved Box Office Collection: रितेश देशमुख दिग्दर्शित आणि अभिनित 'वेड' चित्रपटाने प्रेक्षकांना अक्षरश: वेड लावले आहे. हा चित्रपट २०२२ या वर्षातील अखेरचा चित्रपट ठरला. चित्रपटाने प्रदर्शनाच्या पहिल्याच आठवड्यात बॉक्स ऑफिसवर करोडोंची कमाई केली असून प्रेक्षक अजूनही चित्रपट पाहण्यासाठी गर्दी करत आहे. चित्रपट प्रदर्शन होऊन एक आठवडा उलटून गेला असून चित्रपटाने आतापर्यंत लक्षणीय कमाई केली आहे.

चित्रपटात प्रमुख भूमिकेत जिनिलीया आणि रितेश देशमुख आहेत. या चित्रपटातून जिनिलीयाने मराठी चित्रपटसृष्टीत पदार्पण केले असून रितेशचा हा पहिलाच दिग्दर्शित केलेला चित्रपट आहे. एका आठवड्यातच या चित्रपटाने अनेक बॉलिवूड चित्रपटांना पिछाडीवर टाकत जबरदस्त कमाई केली आहे. रणवीर सिंगच्या ‘सर्कस’लाही या चित्रपटाने आठवड्याभरातच मागे टाकले.

चित्रपटाने प्रदर्शनाच्या पहिल्या दिवशी २ कोटी २५ लाख रुपये कमाई केली. तर दुसऱ्या दिवशी ३ कोटी २५ लाख रुपये गल्ला जमावला. रविवारी ४ कोटी ५० लाख तर सोमवारी ३ कोटी रुपये या चित्रपटाने कमावले. चित्रपटाची ९ व्या दिवसाची कमाई पाहून तर सगळ्यांनाच आश्चर्य वाटलं आहे.

रितेशचा 'वेड' चित्रपट एका दाक्षिणात्य चित्रपटाचा रिमेक असून हा चित्रपट लोकांच्या चांगलाच पसंतीस पडला आहे. ट्रेड रिपोर्ट आणि एक्स्पर्टच्या म्हणण्यानुसार ‘वेड’ या चित्रपटाने ९ व्या दिवशी तब्बल ५ कोटींचा गल्ला कमावला आहे. आत्तापर्यंत या चित्रपटाने सर्वाधिक कमाई केलेला चित्रपट ठरला आहे.

चित्रपटाला जर प्रेक्षकांनी असाच प्रतिसाद दिला तर हे आकडे येत्या काळात आणखी वाढतील अशी अपेक्षा व्यक्त करण्यात येत आहे. आठवड्याभरात या चित्रपटाने तब्बल २७.७२ कोटीची कमाई केली असून ही कमाई मराठी चित्रपटसृष्टीसाठी फारच अभिमानास्पद आहे.

‘वेड’ या मराठी चित्रपटासमोर अनेक बॉलिवूड चित्रपटांची जादू मात्र फिकी पडली. आता हा चित्रपट आणखी किती कमाई करणार, याकडे सर्वाचंच लक्ष लागलं आहे.