मुंबई : अभिनेत्री जान्हवी कपूर (Janhvi Kapoor) गेल्या काही दिवसांपासून तिच्या 'गुड लक जेरी'(Good Luck Jeery) या सिनेमाच्या पोस्टर आणि टीझरमुळे चर्चेत आहे. जान्हवीच्या 'गुड लक जेरी' या आगामी सिनेमाचा ट्रेलर काही वेळापूर्वीच रीलीज झाला आहे. तीन मिनिटांच्या या ट्रेलरमध्ये जान्हवीने साकारलेल्या जया कुमारी उर्फ ​​जेरीची निरागसता पाहायला मिळत आहे.

'गुड लक जेरी' सिनेमाचा ट्रेलर खूपच मजेशीर आहे. जान्हवी कपूर म्हणजेच जेरी ही बिहारची असून कामाच्या शोधात पंजाबमध्ये आल्याचे ट्रेलरमध्ये दाखवण्यात आले आहे. तिची आई आजारी असते, म्हणून अनेक काम शोधून झाल्यानंतर शेवटी जेरी ड्रग्‍स विकणाऱ्या लोकांकडे काम मागण्यासाठी जाते. निरागस दिसणारा जेरी या कामात सहभागी होईल याची कल्पनाही कोणी करू शकत नाही. पण एवढी निरागस दिसणारी जेरी हतबल होऊन या धंद्यात सामील होते की यामागचं कारण काही वेगळं आहे, हे उघड केलं नाही आहे.

दिग्दर्शक सिद्धार्थ सेन गुप्ताने या चित्रपटाचे दिग्दर्शन केले असून आनंद एल. राय यांनी या चित्रपटाची निर्मिती केली आहे. जान्हवीचा 'गुड लक जेरी' हा चित्रपट सिनेमागृहांऐवजी थेट २९ जुलै रोजी डिस्ने प्लस हॉटस्टार या ओटीटी प्लॅटफॉर्मवर प्रदर्शित होणार आहे.

जान्हवीने कोरोनाच्या काळात पंजाबमध्ये या चित्रपटाचे शूटिंग केले आहे. या शूटिंगदरम्यान तिला पंजाबमधील शेतकऱ्यांच्या विरोधालाही सामोरे जावे लागले होते. वर्क फ्रंटवर जान्हवी कपूर करण जोहरच्या 'कॉफी विथ करण' या चॅट शोमध्ये तिची मैत्रिण सारा अली खानसोबत दिसणार आहे. या शोमध्ये दोन्ही अभिनेत्रींमधील केमिस्ट्री पहिल्यांदाच पाहायला मिळणार आहे.