Thalapathy Vijay: आज तमिळ सुपरस्टार विजय यांच्यासाठी अत्यंत विशेष दिवस आहे. सध्या तमिळनाडू विधानसभा निवडणुकीचे निकाल जाहीर होत आहेत. राजकारणाच्या क्षेत्रात प्रवेश करण्यासाठी विजय यांनी चित्रपटांपासून ब्रेक घेतला आणि स्वतःचा राजकीय पक्ष स्थापन केला. निवडणुकीच्या निकालांमध्ये, विजयचा पक्ष सध्या आघाडीवर असल्याचे दिसून येत आहे. अभिनेता विजय हे तमिळनाडूचे पुढील मुख्यमंत्री बनणार, हे आता जवळपास निश्चित झाले आहे.

अभिनेते विजयचे पूर्ण नाव 'जोसेफ विजय' असे आहे; तरीही सामान्य जनता त्यांना 'थलपती' विजय म्हणूनच ओळखते. रजनीकांत आणि कमल हासन यांच्या पावलावर पाऊल टाकले. विजय यांनी तमिळ चित्रपटसृष्टीतील सर्वात मोठा सुपरस्टार मानले जाते. त्यांचे चित्रपट बॉक्स ऑफिसवर प्रचंड कमाई करतात. गेल्या ३० वर्षांपासून विजयांचे 'कॉलीवूड'वर वर्चस्व राहिले आहे आणि त्यांचे आपल्या चाहत्यांशी अतूट नाते आहे.

विजयांनी १९८४ मध्ये बालकलाकार म्हणून आपल्या चित्रपट कारकिर्दीची सुरुवात केली. त्यानंतरच्या काळात, त्यांनी अनेक चित्रपटांमध्ये भूमिका साकारल्या. १९९२ मध्ये नालैया थीरपू या चित्रपटाद्वारे विजयांनी मुख्य अभिनेता म्हणून चित्रपटसृष्टीत पदार्पण केले. त्यानंतर त्यांचे एकापाठोपाठ अनेक चित्रपट प्रदर्शित झाले, ज्यांच्या माध्यमातून त्याला प्रचंड लोकप्रियता मिळू लागली. १९९४ मध्ये प्रदर्शित झालेल्या रसिकन या चित्रपटाच्या यशामुळे 'इलयथलपती' ही उपाधी मिळाली. ज्याचा अर्थ 'तरुण सेनापती' असा होतो.

अनेक वर्षांपर्यंत विजय यांना 'इलयथलपती' म्हणून संबोधले जात राहिले. पण, २०१७ मध्ये शाहरुख खानच्या जवान या चित्रपटाचे दिग्दर्शक असलेल्या ॲटलीच्या सहयोगाने त्यांनी 'इलायतलपती' या बिरुदावरून केवळ 'थलपती' म्हणजे सेनापती या नावाने ओळखले जाऊ लागले. ॲटली यांच्या 'मर्सल' या चित्रपटात, त्यांच्या नावापुढे 'थलपती' हे बिरूद जोडले आणि त्या क्षणापासून, ते 'थलपती विजय' म्हणून ओळखले जाऊ लागले. त्यांच्या चाहत्यांनीही या बदलाचा अत्यंत उत्साहाने जल्लोष केला. विजय यांनी ॲटली यांच्यासोबत एकूण तीन चित्रपट केले आणि ते सर्वच्या सर्व चित्रपट बॉक्स-ऑफिसवर 'सुपरहिट' ठरले.

थलपती विजय यांच्या आगामी जन नायकन या चित्रपटाचीही प्रेक्षक मोठ्या आतुरतेने वाट पाहत आहेत. हा चित्रपट गेल्या पाच महिन्यांपासून सेन्सॉर बोर्डाशी संबंधित कायदेशीर आणि प्रशासकीय अडचणींमध्ये अडकलेला आहे. आता, जर विजय यांना निवडणूकीत यश मिळाले, तर या चित्रपटाचे प्रदर्शन जवळजवळ निश्चित मानले जात आहे.