Actress Death: तमिळ टेलिव्हिजन इंडस्ट्रीला आज मोठा धक्का बसला आहे. लोकप्रिय अभिनेत्री सुभाषिनी हिने चेन्नईतील तिच्या राहत्या घरी आत्महत्या केल्याची धक्कादायक घटना समोर आली आहे. या अचानक घडलेल्या प्रकारामुळे चाहत्यांसह संपूर्ण मनोरंजन विश्वात शोककळा पसरली आहे.

मिळालेल्या माहितीनुसार, सुभाषिनी ही चेन्नईतील आय्यप्पंथंगल परिसरातील अपार्टमेंटमध्ये राहत होती. रविवारी रात्री तिचा मृतदेह घरात आढळून आला. घटनेची माहिती मिळताच पोलिसांनी घटनास्थळी धाव घेत मृतदेह ताब्यात घेत पुढील तपास सुरू केला आहे. प्राथमिक तपासात हा आत्महत्येचा प्रकार असल्याचा संशय व्यक्त करण्यात येत आहे.

सुभाषिनी ही मूळची श्रीलंकेची रहिवासी होती आणि तमिळ मनोरंजन क्षेत्रात करिअर घडवण्यासाठी ती चेन्नईत स्थायिक झाली होती. तिने अनेक मालिकांमध्ये काम केले असून ‘कायल’ या लोकप्रिय मालिकेमुळे तिला विशेष ओळख मिळाली. तिच्या अभिनयामुळे तिने प्रेक्षकांच्या मनात घर केले.

दरम्यान, काही वृत्तांनुसार आत्महत्येपूर्वी तिचा पतीसोबत व्हिडिओ कॉलवर वाद झाल्याची माहिती समोर येत आहे. या वैयक्तिक वादामुळे मानसिक ताण निर्माण झाल्याची शक्यता पोलिसांनी व्यक्त केली असून या प्रकरणाचा सर्व बाजूंनी तपास सुरू आहे.

१२ एप्रिल रोजी तिचा वाढदिवस होता. तर, २१ एप्रिल रोजी तिच्या लग्नाचा दुसरा वाढदिवस होता. सुभाषिणी सोशल मीडियावर मोठ्या प्रमाणात सक्रिय होती. इन्स्टाग्रामवर तिचे ४ लाखांहून अधिक फॉलोअर्स होते. सुभाषिनीच्या निधनानंतर सोशल मीडियावर शोक व्यक्त केला जात असून तिचे सहकलाकार आणि चाहते भावनिक प्रतिक्रिया देताना दिसत आहेत. अनेकांनी तिच्या अभिनयाची आठवण काढत श्रद्धांजली अर्पण केली आहे.