Vijay Thalapathy: तमिळनाडू विधानसभा निवडणूक 2026 मध्ये यंदा राजकारणासोबतच सिनेसृष्टीचा जबरदस्त प्रभाव पाहायला मिळत आहे. अनेक प्रसिद्ध चित्रपट कलाकारांनी या निवडणुकीत थेट राजकीय मैदानात उतरून वातावरण अधिक रंगतदार केले आहे. सुपरस्टार विजय थलपतीपासून ते खुशबू सुंदर, गौतमी, आर. सरथकुमार आणि उदयनिधी स्टालिन यांसारख्या अनेक दिग्गज कलाकारांनी आपले राजकीय नशीब आजमावण्याचा निर्णय घेतला आहे.

यामध्ये सर्वाधिक चर्चेत असलेले नाव म्हणजे विजय थलपती. त्यांनी 2024 मध्ये ‘तमिळगा वेत्री कळगम’ (TVK) हा पक्ष स्थापन करून थेट 2026 च्या निवडणुकीत उडी घेतली आहे. विशेष म्हणजे त्यांनी ही निवडणूक कोणत्याही आघाडीशिवाय स्वतंत्रपणे लढवण्याचा निर्णय घेतला. ज्यामुळे राज्याच्या राजकारणात मोठी चुरस निर्माण झाली आहे.

दुसरीकडे, प्रसिद्ध अभिनेत्री खुशबू सुंदर या भाजपच्या नेत्या म्हणून निवडणुकीत सक्रिय आहेत. अभिनयासोबतच त्यांनी राजकारणातही स्वतःची ओळख निर्माण केली आहे. त्याचप्रमाणे अभिनेत्री गौतमी AIADMKच्या तिकिटावर निवडणूक लढवली आहेत, तर आर. सरथकुमार एनडीएच्या प्रचारात सहभागी झाले आहेत.

मुख्यमंत्री एम. के. स्टालिन यांच्यासह त्यांचा मुलगा उदयनिधी स्टालिन हेदेखील या निवडणुकीत महत्त्वाची भूमिका बजावत आहेत. उदयनिधी यांनी चित्रपटसृष्टीतून राजकारणात येत युवा मतदारांना आपल्या बाजूने करण्यावर भर दिला आहे.

तमिळनाडूच्या राजकारणात चित्रपट कलाकारांचा प्रभाव नवीन नाही. यापूर्वी एमजीआर आणि जयललिता यांसारख्या सुपरस्टार्सनी राज्याचे नेतृत्व केले आहे. त्यामुळे या निवडणुकीतही सिनेस्टार्सची एन्ट्री राज्याच्या राजकीय समीकरणात मोठा बदल घडवू शकते. आता या कलाकारांचे राजकीय भवितव्य कसे असेल कोणी विजयी होईल आणि कोणाचा पराभव हे आज म्हणजेच ४ मे रोजी कळेलच.