निर्माता,अभिनेता सोनू सूद कायमच चर्चेत असतो. गरीबांना मदत करणारा रिअल हिरो म्हणून सोनू सूदला ओळखले जाते. सोनू सूद कायमच गरीबांच्या मदतीला धावून येत असतो. नुकतंच सोनू सूदने एका मुलीला मदत करत प्रेरणा दिली आहे.

गरीबांना मदत करणारा रिअल हिरो म्हणून ओळख असलेल्या अभिनेता सोनू सूदच्या मदतीमुळे कोपरगाव शहरातील गायत्री थोरात या मुलीला गमावलेली दृष्टी पुन्हा परत मिळाली आहे. गायत्रीच्या जीवनातील अंधकार दूर झाला असून तिच्या जीवनात पुन्हा नवा दिवस उजाडला आहे.

अहिल्यानगर जिल्ह्यातील कोपरगाव येथे राहणारी गायत्री दशरथ थोरात ही अडीच वर्षांची असताना तिच्या डोळ्यात चुना गेल्यामुळे तिचा डावा डोळा पूर्ण निकामी झाला होता तर उजव्या डोळ्याने देखील पुसटसं दिसत होतं. आता आपल्याला जन्मभर असंच राहावं लागणार याचे दुख गायत्रीला होते. अशातच अभिनेता सोनू सुद या गायत्रीच्या मदतीला धावून आला आहे.

कोपरगाव येथील सोनू सूदचे मित्र विनोद राक्षे यांच्या मदतीने सोनूने पुढाकार घेतला आहे. सोनूच्या मदतीने महागडी डोळ्यांची शस्त्रक्रिया करून गायत्रीची गेलेली दृष्टी पुन्हा मिळाली आहे. गायत्रीला दृष्टी मिळावी यासाठी तिचे वडील दशरथ आणि भाऊ कार्तिक थोरात यांनी खूप प्रयत्न केले मात्र शस्त्रक्रियेसाठी मोठा खर्च असल्याने गायत्रीचे उपचार थांबले होते. सोनू सुदच्या उदारतेमुळे 14 वर्षीय गायत्रीच्या जिवनात प्रकाश आला आहे.