प्रसिद्ध गायक आणि माजी खासदार हंसराज हंस यांची पत्नी रेशम कौर यांचं निधन झालं आहे. रेशम या गेल्या काही दिवसांपासून आजारी होत्या. आजारी असल्याने जालंधरच्या टागोर रुग्णालयात दाखल करण्यात आलं होतं. याच रुग्णालयात रेशम कौर यांनी शेवटचा श्वास घेतला. रेशम कौर यांनी बुधवारी दुपारी १ वाजता अंतिम श्वास घेतला. गायक हंस यांच्या पत्नी या हृदयाशी संबंधित आजाराशी त्रस्त होत्या.

रेशम कौर यांच्यावर रुग्णालयात उपचार करण्यात आले. मात्र, त्यांच्या तब्येतीवर फारसा परिणाम झाला नाही. रेशम कौर यांनी वयाच्या ६२ व्या वर्षी शेवटचा श्वास घेतला. दलेर मेहंदी यांची मुलगी अजित कौर हिचं लग्न रेशम-हंसराज यांचा मुलगा नवराज हंसशी झालं आहे.

१६ दिवसानंतर म्हणजे १८ एप्रिल रोजी रेशम आणि गायक हंसराज हंस यांच्या लग्नाचा होता. लग्नाच्या वाढदिवसाच्या आधीच रेशम यांनी जगाचा निरोप घेतला. रेशम यांच्या मृत्यूची वार्ता कळताच हसंराज यांच्या घरी लोकांच्या भेटीगाठी वाढल्या.

कधी होणार अंत्यसंस्कार?

मीडिया रिपोर्टनुसार, रेशम कौर यांचा भाऊ परमजीत सिंह यांनी सांगितलं की, रेशम यांचं निधन आज दुपारी १ वाजता झालं. मागील ५ दिवसांपासून रेशम या रुग्णालयात उपचार घेत होत्या. त्याआधी त्यांची तब्येत ठीक होती. मात्र, त्यांची अचानक तब्येत बिघडली. काही दिवसाआधी त्यांना पहिल्यांदा हार्टअॅटक आला होता. त्यामुळे त्यांना रुग्णालयात दाखल करण्यात आलं. मात्र, त्यांचं आज निधन झालं. त्यांच्या पार्थिवावर गुरुवारी ११ वाजता शफीपूर येथे अंत्यसंस्कार केले जातील'.