नागपुरातील गायिका अंजली भारती वादात सापडली आहे. अंजली भारतीने भंडाऱ्यात मुख्यमंत्री देवेंद्र फडणवीस यांच्या पत्नी अमृता फडणवीस यांच्या विरोधात केलेल्या आक्षेपार्ह वक्तव्यामुळे चहुबाजूंनी टीका होत आहे. भाजपच्या वरिष्ठ नेत्यांनी अंजली भारतीवर कारवाईची मागणी केली आहे. तर ठाकरे गटाच्या किशोरी पेडणेकर यांनी अंजलीच्या वक्तव्याचा निषेध केला आहे. आता अंजली भारतीच्या आक्षेपार्ह वक्तव्याची महिला आयोगाने गंभीर दखल घेतली आहे.

अंजली भारतीने भंडाऱ्यातील अशोक नगर येथे १३ जानेवारी २०२६ रोजी आयोजित कार्यक्रमात अमृता फडणवीस यांच्याबाबत आक्षेपार्ह वक्तव्य केलं होतं. या वक्तव्याचा व्हिडिओ सोशल मीडियावर व्हायरल झाला होता. अंजली भारतीच्या वक्तव्याची आता महाराष्ट्र राज्य महिला आयोगाने गंभीर दखल घेतली आहे.

सार्वजनिक कार्यक्रमात अपशब्द वापरून महिलेचा अपमान करणे, त्यांची प्रतिमा मलिन करण्याचा प्रयत्न करून त्यांच्या सन्मान आणि प्रतिष्ठेला धक्का पोहोचवणाऱ्या आक्षेपार्ह वक्तव्यावर तात्काळ कठोर कार्यवाही करण्यात यावी, असे निर्देश राज्य महिला आयोगाने भंडाऱ्याचे जिल्हाधिकारी, विभागीय आयुक्तांना दिले आहेत.

धर्मपाल मेश्राम काय म्हणाले?

अंजली भारतीच्या वक्तव्यावर भाजपचे धर्मपाल मेश्राम यांनी म्हटलं की, डॉ. बाबासाहेब आंबेडकर यांच्या नावाने आयोजित भीम मेळाव्यात गायिका अंजली भारतीने मुख्यमंत्री देवेंद्र फडणवीस यांच्या पत्नीविषयी भंडारा जिल्ह्यातील फुलमोगरा या गावात आक्षेपार्ह वक्तव्य केलं. भाजपच्या वतीने या घटनेच्या निषेध व्यक्त करण्यात आला.

भाजपचे प्रदेश प्रवक्ते ॲड. धर्मपाल मेश्राम यांनी संबंधित महिला आणि कार्यक्रमाच्या आयोजकांवर कठोर कारवाई करण्याची मागणी केली आहे. प्रसिद्धीसाठी मर्यादा ओलांडून केलेले हे वक्तव्य महिलांच्या सन्मानाला धक्का देणारे आहे. तसेच डॉ. बाबासाहेब आंबेडकर यांच्या विचारांशी विसंगत असल्याचे त्यांनी नमूद केले. अशा प्रकारच्या कार्यक्रमांना यापुढे परवानगी देऊ नये, अशी मागणीही धर्मपाल मेश्राम यांनी केली आहे.