टीव्हीवरील संस्कारी सुनेच्या भूमिकेने घराघरांत लोकप्रिय झालेली अभिनेत्री रतन राजपूत हिने काही दिवसांपूर्वी सोशल मीडियावर तिच्या आयुष्यात घडलेली एक भीषण घटना सांगितली आहे. ‘अगले जनम मोहे बिटिया ही कीजो’ या मालिकेमुळे घराघरात पोहोचलेल्या रतनने नुकताच सोशल मीडियावर एक व्हिडिओ शेअर करत तिच्या आयुष्यातील भीषण अनुभव उघड केला आहे. या घटनेने महिलांच्या सुरक्षिततेचा गंभीर प्रश्न पुन्हा एकदा समोर आणला आहे.

रतन राजपूतने तिच्या व्ह्लॉगमध्ये एका विचित्र आणि धक्कादायक रात्रीचा किस्सा शेअर केला. ती फोनवर बोलत असताना अचानक एका अज्ञात व्यक्तीने तिचा फोन हिसकावला आणि नंतर तो पळून गेला. रतनने मदतीसाठी जोरात आरडाओरडा केला, पण त्या आसपासचे लोक फक्त तमाशा पाहत होते आणि कोणालाही मदत करण्याची इच्छा नव्हती.

त्या अज्ञात व्यक्तीचा फोन हिसकावल्यानंतर, रतन जेव्हा मदतीला कोणीतरी येईल अशी अपेक्षा करत होती, तेव्हा एक तरुण समोर आला आणि म्हणाला की तो तिला मदत करून तिचा फोन परत देईल. ते म्हणताच त्याने रतनचा हात धरला आणि जोरात खेचत जंगलाकडे नेलं. रतन या अचानक घडलेल्या परिस्थितीवर घाबरली. तिला वाटलं की आता ती वाचणार नाही किंवा तिच्यावर काही वाईट होणार आहे.

रतनने सांगितले की त्या मुलाच्या हावभाव विचित्र होते. ज्यामुळे तिला अजूनच भीती वाटू लागली. तिला जाणवलं की ही परिस्थिती काही साधी नाही आणि ती भलतच काही वाईट गोष्टीमध्ये फसली आहे. पण नशीबाने दोन मुली स्कुटीवरून त्या दिशेने आल्या आणि तिला मदत केली. त्यांनी त्या अज्ञात मुलाला तिचा हात सोडण्यास सांगितले आणि शेवटी रतनची सुटका झाली आणि त्या तिथून निघून गेल्या

रतनने या घटनेतून असा संदेश दिला की, जरी आपण मदतीसाठी आरडाओरडा करत असलो तरी, लोक फक्त पाहतात पण पुढे येऊन मदत करत नाहीत आणि अशा परिस्थितीत आपल्याला सुरक्षिततेबद्दल जागरूक राहणे आवश्यक आहे. या घटनेमुळे तिच्या चाहत्यांना धक्का बसला आहे आणि तिला स्वतःच्या सुरक्षिततेला प्राधान्य देण्याचा सल्ला देत आहे.