'दादा - द सौरव गांगुली स्टोरी' (Dada - The Sourav Ganguly Story) या चित्रपटाचा पहिला पोस्टर नुकताच रिलीज करण्यात आला आहे. या चित्रपट माजी भारतीय क्रिकेट कर्णधार सौरव गांगुली यांच्या जीवनावर आधारित आहे. या चित्रपटात सौरव गांगुली यांची भूमिका बॉलिवूडचा सुपरस्टार अभिनेता साकारणार आहे. आज (८ जुलै २०२६) सौरव गांगुली यांचा वाढदिवस आहे. वाढदिवसानिमित्त चाहत्यांना हे मोठे सरप्राइज देण्यात आले आहे.

'दादा' चित्रपटात सौरव गांगुली यांच्या भूमिकेत अभिनेता राजकुमार राव झळकणार आहे. चित्रपटातील त्याचा 'फर्स्ट लूक ' प्रदर्शित केला आहे. जो पाहून चाहते चित्रपटासाठी खूपच उत्सुक आहे. पोस्टच्या कॅप्शनमध्ये लिहिलं की, "आमच्या अत्यंत लाडक्या दादाला (सौरव गांगुली) वाढदिवसाच्या शुभेच्छा..." या पोस्टरवर चाहते, नेटकरी आणि कलाकार मंडळी भरभरून कमेंट्सचा पाऊस पाडत आहेत.

'फर्स्ट लूक' पोस्टरमध्ये राजकुमार राव, सौरव गांगुलीच्या त्या ऐतिहासिक 'जर्सी फिरवण्याच्या' कृतीची हुबेहूब नक्कल करताना दिसत आहे. २००२ च्या नॅटवेस्ट ट्रॉफीच्या अंतिम सामन्यात इंग्लंडवर भारताने मिळवलेल्या अविस्मरणीय विजयानंतर लॉर्ड्सच्या बाल्कनीत गांगुलीने हा जल्लोष केला होता. पोस्टरमधून राजकुमार रावच्या अभिनयाची एक झलक पाहायला मिळत आहे.

'दादा' चित्रपटाची रिलीज डेट

नवीन वर्षात 'दादा - द सौरव गांगुली स्टोरी' हा चित्रपट रिलीज होत आहे. चित्रपटाची रिलीज डेटही घोषित करण्यात आली आहे. राजकुमार राव मुख्य भूमिकेत असलेला 'दादा' हा चित्रपट १४ मे २०२७ रोजी चित्रपटगृहांमध्ये प्रदर्शित होईल.