Aanandi Joshi : मनोरंजन क्षेत्रामध्ये काम करणाऱ्यांना अनेकदा ट्रोलिंगचा सामना करावा लागतो. सोशल मीडियावर अभिनेते, अभिनेत्री, गायक, दिग्दर्शक ट्रोल होत असल्याचे पाहायला मिळते. बरेचदा दिसण्यावरुन, कपड्यांवरुन त्यांच्यावर लोक टीका करत असतात. काहीजण तर विचार न करता मर्यादा ओलांडत काहीही कमेंट करतात. असाच प्रकार एका मराठी गायिकेसोबत घडला आहे. गायिकेशी संबंधिक एका डॉक्टरने असभ्य, अश्लील कमेंट केली. तिने सोशल मीडियावर हा अनुभव शेअर केला.

मराठी सारेगमप लिटिल चॅम्प्स या कार्यक्रमातून लोकप्रिय झालेली गायिका आनंदी जोशी हिच्यासोबत हा प्रकार घडला आहे. यासंबंधित माहिती तिने इन्स्टाग्राम स्टोरीवर शेअर करत दिली. पहिल्या स्टोरीमध्ये तिने एका व्यक्तीबरोबर फोटो पोस्ट केला. माझ्या कॉन्सर्टसाठी ही व्यक्ती मागच्या वर्षी आली होती. त्याने माझ्याबरोबर काढलेला हा फोटो सुद्धा शेअर केला. मेसेज करुन माझ्या कामाचे कौतुक सुद्धा केले होते. आज सकाळी मला हा मेसेज दिसला.

त्यानंतर आनंदीने दुसरी स्टोरी शेअर केली. यात तिने स्क्रीनशॉट शेअर केला. यात आनंदीचाच फोटो होता, त्यात बघ किती डीप क्लिवेज आहे असे लिहिले होते. हा मेसेज त्या व्यक्तीनेच केला होता. त्याला तो मेसेज त्याच्या मित्राला पाठवायचा होता. पण चुकून तो मलाच पाठवला. तू चुकून मलाच मेसेज केला आहेस असे मीच त्याचा मेसेज केला. त्यानंतर तो मेसेज त्याने डिलीट केला.

आनंदीने पुढे स्टोरी शेअर करताना या संपूर्ण प्रकारावर भाष्य केले. मला त्याने काय मेसेज केला हे त्याबद्दल नाही. पण तो एक बालरोगतज्ज्ञ आहे. जो व्यक्ती एका मुलीच्या शरीरावर असं बोलतो. त्याला लहान मुलांच्या शरीराला स्पर्श करण्याची परवानगी असते. बोलू न शकणाऱ्या आणि स्वतःचा बचाव करू न शकणाऱ्या बाळांशी तो थेट संपर्कात असतो. ही गोष्ट मला खूपच भीतीदायक वाटते. म्हणूनच लोकांनी सतर्क राहावे आणि आपल्या मुलांची काळजी घ्यावी, असे आनंदीने पोस्टमध्ये लिहिले.

अशा लोकांकडे किंवा त्यांच्या कमेंट्सकडे दुर्लक्ष करावे असे काहीजण म्हणतात. पण तसे केल्याने त्यांना वाटते की ते जसे वागतात ते योग्यच आहे. अशा लोकांकडून महिला, लहान मुल आणि प्राणी यांना धोका आहे. तेव्हा अशा गोष्टींकडे लक्ष दिले, तर अशा लोकांना ओळखणे आणि संभाव्य धोका टाळणे शक्य होते, असेही आनंदी जोशीने म्हटले. तिने कमेंट करणाऱ्या बालरोगतज्ज्ञांचे नाव आणि त्याचा पत्ता शोधून ही काढला.