Madhurani Prabhulkar: 'आई कुठे काय करते' या मालिकेतील मुख्य भूमिकेत असलेल्या अभिनेत्री मधुराणी प्रभुलकर आणि त्यांचे पती प्रमोद प्रभुलकर यांची ऑनलाईन आर्थिक फसवणूक झाल्याचं समोर आलं आहे. दिवाळीच्या सुट्ट्यांमध्ये गणपतीपुळे येथे फिरायला जाण्याकरिता त्यांनी ऑनलाईन पद्धतीने हॉटेल बूक केले होते. पण त्यांची त्या ठिकाणी फसवणूक झाल्याची माहिती समोर येत आहे. ऑनलाईन पद्धतीने त्यांना 17 हजाराचा गंडा घालण्यात आला होता.

गणपतीपुळ्यात त्यांनी दोन दिवसांच्या हॉटेल बुकिंगसाठी १७ हजार इतकी रक्कम भरली होती, पण त्या ठिकाणी गेल्यावर काही वेगळेच प्रकरण समोर आले. त्या हॉटेलवर त्यांच्या नावाने कोणतीच बुकिंग न झाल्याचं त्यांना समजलं. प्रमोद प्रभुलकर यांनी तिथल्या मॅनेजमेंटला याबाबत चौकशी केली असता मॅनेजमेंटकडून उडवाउडवीचे उत्तरे मिळाली होती, असा आरोपच प्रमोद प्रभुलकर यांनी केला.

संबंधित रिसॉर्ट शिवसेनेच्या शिंदे गटातील नेते रवींद्र फाटक यांचे असल्याचे मॅनेजमेंटने सांगितले. 4 स्टार असलेल्या हॉटेलमध्ये फसवणूक झाल्याने सर्वांनाच आश्चर्याचा धक्का बसला आहे.

परंतु ही फसवणूक हॉटेलकडून झालेली नसल्याचेही यावेळी स्पष्ट झालेय. उत्तर भारतीय व्यक्तींकडून हॉटेलची साईट हॅक केल्याचे यावेळी उघडकीस आले. प्रभूलकर यांच्यासोबत आणखी एका व्यक्तीचे एक लाख साठ हजारांची फसवणूक झाल्याचाही व्हिडओ माध्यमांमध्ये व्हायरल झाला आहे.

Edit By: Chetan Bodke