Mylek Movie:

मराठमोळी अभिनेत्री सोनाली खरे (Sonali Khare) लवकरच 'मायलेक' चित्रपटाच्या (Mylekh) माध्यमातून प्रेक्षकांच्या भेटीला येणार आहे. या चित्रपटाच्या माध्यमातून सोनाली खरे आणि रिअल लाइफ मुलगी आपल्याला एकत्र पाहायला मिळणार आहे. नावावरूनच हा चित्रपट आई आणि मुलीच्या नातेसंबंधावर आधारित आहे. रिअल लाइफ मायलेकीची अनोखी कथा आपल्याला चित्रपटाच्या माध्यमातून पाहायला मिळणार आहे. पोस्टर, टीझर आणि गाण्यानंतर नुकताच या चित्रपटाचा जबरदस्त ट्रेलर प्रदर्शित झाला. या ट्रेलरला प्रेक्षकांकडून खूपच चांगला प्रतिसाद मिळत आहे.

मायलेक चित्रपटाचा ट्रेलर लाँच सोहळा नुकताच पार पडला. या सोहळ्याला मराठी सिनेसृष्टीतील अमृता खानविलकर, हर्षदा खानविलकर, संजय जाधव यांनी हजेरी लावली होती. मायलेकच्या ट्रेलरमध्ये आई-मुलीचे स्ट्राँग बाँडिंग दिसत असतानाच त्यांच्या या सुंदर नात्यात दुरावा येत असल्याचेही पाहायला मिळत आहे. आता हा दुरावा का येतोय, यात उमेशची भूमिका काय? या मायलेक पुन्हा एकत्र येणार का? तुम्हाला पडलेल्या अशा सर्व प्रश्नांची उत्तरं तुम्हाला हा चित्रपट रिलीज झाल्यानंतर मिळणार आहे.

ब्लुमिंग लोटस प्रोडक्शन्स, सोनाली सराओगी प्रस्तुत प्रियांका तन्वर दिग्दर्शित या चित्रपटाची सोनाली आनंद निर्माती आहे. या चित्रपटात सोनाली खरे, सनाया आनंद, उमेश कामत बिजय आनंद, शुभांगी लाटकर, संजय मोने यांच्या प्रमुख भूमिका असणार आहेत. कल्पिता खरे, बिजय आनंद सहनिर्मिती या चित्रपटाचे नितीन प्रकाश वैद्य या चित्रपटाचे असोसिएट प्रोड्यूसर आहेत. आई आणि मुलीची सुंदर केमिस्ट्री मायलेकमधून पाहायला मिळणार आहे. हा चित्रपट येत्या १९ एप्रिल रोजी प्रदर्शित होणार आहे.

सोनाली खरेने चित्रपटाबद्दल सांगितले की, 'हा चित्रपट प्रत्येक आई-मुलीची गोष्ट सांगणारा आहे. खूप संवेदनशील असे हे नाते आहे. हे नाते कधी मैत्रीचे असते तर कधी एका वेगळ्याच वळणावर जाते. त्यामुळे हे नाजूक नाते उत्तमरित्या, विचारपूर्वक हाताळणे खूप गरजेचे आहे. 'मायलेक'मधून कोणताही संदेश देण्यात आलेला नसून तुमच्या आमच्या घरातील 'मायलेकी'ची ही जोडी आहे. ज्या धमाल, मजामस्ती करत आहेत. वाईट काळात मोठे निर्णय घेताना एकमेकींना साथही देत आहेत. त्यामुळे मायलेक तुम्हाला विशेषतः आईमुलीला खूप जवळचा वाटेल. माझे आणि सनायाचे नातेही असेच आंबटगोड आहे.'